Akileraarutit qaffanneqarnavianngillat

Aningaasanut inatsisissatut siunnersuutip aappaagumoortup inatsisartuni ualiartoq siullermeerneqarnerani tamanna paasinarsivoq.
Allattoq Oline I. Olsen
oktobarip 02-at 2007 13:54

Akileraarutit qaffanneqannginnissaat Siumukkut, Atassutikkut, Demokraatit Kattusseqatigiillu Partiiata ersarissumik oqariartuutigaat.

Akissarsiaqqortunerinnaat ilaatigut akileraarnerusalersinneqarnerisigut aningaasat matussutissatut aaneqarsinnaasut Inuit Ataqatigiit isumaqarput:

- Inuit Ataqatigiit siunnersuuteqarpugut aningaasat amigaatigineqartut ilaat isertitaqqortuuniit aaneqarsinnaasut. Innuttaasut atugaat ajornerulersinngikkaluarlugit pisinnaasut akileraarnerulernerisigut tamanna periarfissaqartoq isumaqarpugut, Inuit Ataqatigiit oqaaseqartuat Agathe Fontain oqarpoq.

Akileraartitseriaaseq maannamut atuuttoq allanngortinneqassagaluarpat naalakkersuisoqatigiit Siumukkut Atassutikkullu ajalusoornerannik kinguneqassagaluarpoq, isertitaqqortunerinnaallu akileraaruserneqartalernissaat isumaqatiginngilluinnarini Atassutip oqaaseqartua Augusta Salling oqarpoq.

- Naalakkersuisoqatigiit Siumut aamma Atassut naalakkersuisoqatigiinnermi isumaqatigiissutaatigut qulakkeerneqarpoq naalakkersuisoqatigiinnerup akileraartitseriaaseq ullumikkutut atuuttoq aalajangiusimaneqassasoq, Augusta Salling oqarpoq.

Partiit assigiinngitsut siunnersuummut oqaaseqaataani erserpoq aningaasartuutit annertusarneqarnissaat ilaatigut siunnersuutigineqartoq. Assersuutigalugu Siumukkut siunnersuutigaat kalaalimerngit naatitallu pisiniarfinni akikinnerulernissaannut suliniutit aallartinneqarnissaat.

Kulturi pillugu immikkut suliniutit annertusarneqarnissaanut aningaasaliisoqarnissaa aamma siunnersuutigineqarpoq.

100 millioni koruuninik isertitaqarnerunissaq suli aningaasalersorneqanngilaq, naalakkersuisullu partiillu akornanni isumaqatigiinniartoqarnikkulluunniit aningaasaqarnermullunniit ataatsimiititaliami aningaasat taakku

nassaariniarneqartussaallutik.