Aalisakkanik minnerpaamik akileraaruserneqarsinnaasunik Ruslandimut tunisaqartalernissaminnut Savalimmiut periarfissaqalerput, EU-mit Norgemit Islandimillu nioqqutissat soorlu aamma minnerpaamik akileraaruserneqartartut.
Ruslandimi Naalakkersuisut ippassaq nalunaarput, Savalimmiunit aalisakkanik tunisaqartalernissaq danskit Naalakkersuisuinut isumaqatigiissuteqarfigisimallugit. Savalimmiut Kalaallit Nunaattulli EU-mut ilaasortaanngillat.
Savalimmiuni Naalakkersuisut nunanut allanut immikkoortortaqarfiani pisortaq, Herluf Sigvaldsson, nutaarsiassaqartitsivimmut Ritzauimut oqarpoq, nioqqutissanik Savalimmiut EU, Norge Islandilu naligalugit Ruslandimut tunisaqartalernissaannut, unammilleqatigiissinnaaneq Savalimmiunut isumaqatigiissutip malitsigigissagaa.
- Raajanik, kapisilinnik ammassassuarnillu Ruslandimut tunisisinnaalernissamut isumaqatigiissut suliffeqarfiutitsinnut arlalinnut pingaaruteqaqaaq, Herluf Sigvaldsson oqarpoq.
Savalimmiut akileraarutit pillugit Ruslandimut isumaqatigiinniarnerat ukioq 2000-imili aallartissimasoq, Herluf Sigvaldssonip ilisimatitsissutigaa. Nioqqutissat Ruslandimiit Savalimmiunut tunineqartartut minnerpaamik aamma akileraaruserneqartartut, nutaarsiassaqartitsivik Ritzau allappoq.