Akileraarutit eqqortumik atorneqartariaqarsorineqarput

Unnussiuaaqatigiinneruvoq naalakkersuinikkullu eqqartuiffiunani. Juullip ukiortaallu nalaani taamaaliornissamut piffissaqartoqarneq ajorpoq, Otto Steenholdt folketingimi inatsisartunilu ilaasortaasimasoq, 2004-mi julefrokostimut qaaqqusaanini pillugu ullumi killisiorneqarami oqarpoq.

Jens Napãtôk’ nalunaarsuinermini allassimagaluarpoq ukiup ingerlanerani naalakkersuinikkut eqqartuinerit qaaqqusinerminut patsisigisimallugit.

Tassunga tunngatillugu Otto Steenholdt ima akissuteqarpoq:

- Naagga, ingasappallaaqaaq, taamatut eqqartuinngilagut, Otto Steenholdt qaammataasakkut TV-iikkut killisiorneqarnermini oqarpoq. Nassuiaallunilu misilittakkani naapertorlugit peqataasut ilisimatinneqartassasut qaaqqusineq ilassinninnermut konto aqqutigalugu akilerneqassasoq. Tamannalu Jens Napãtôk’-mit oqaatigineqanngitsoq unnerlugu.

Naalakkersuinikkut suliaqartoq alla, naalakkersuisoq Tommy Marø aamma Jens Napãtôk’-mit neriartoqqusaasimavoq, eqqaamasinnaanginnerarpaali suna pillugu kikkullu peqataasimanersut, eqqaamasinnaalluguli ataatsimeereernerup kingorna qaaqqusaasimalluni.

Ilisimasalittut allatut killisiorneqartoq soqutiginartoq tassaavoq Jens Godtfredsen, Sirius-imi sakkutuujusimasoq. Jens Godtfredsen-ip Jens Napãtôk’ Illoqqortoormiuniit ilisarisimalersimavaa, taavani INI A/S-imi sulinermini. Marluullutik piniarneq aalisarnerlu, Siriusi Nunalu eqqissisimatitaq soqutisarivaat.

Jens Godtfredsen isumaqarpoq ilaquttanilu akisuunik nereqatigiittarsimanitik ikinngutigiit nereqatigiinnerigaat, Danmarkimimi Kalaallit Nunaannilu atorfiliunnginnerarpoq.

Jens Godtfredsen oqarpoq:

- Isumaqarpunga akileraarutit eqqortumik atorneqartussaasut, taamatut neriartortitsinerit pingasut taaneqarsinnaangillat, naak isumasiuisutut naalakkersuinikkullu siunnersuisutut Jensip naalakkersuineranut inissikkunaraluarlunga.

Manna tikillugu ilisimasalittut killisiorneqartut 16-iupput.