Akileraarutit allanngortinneqarpata ilaat iluanaassapput ilaalli akiliinerussallutik
Akileraartarnermut atugarissaarnermullu ataatsimiititaliap siunnersuutaani siunertarineqarpoq akileraarut 37 procentinut appartinneqassasoq.
Naatsumik oqaatigalugu taassuma siunertaraa sulineq akilersinnaasariaqartoq.
Akileraartutinit isertitsissutaasartut ilaat allamut nuunneqassapput, soorlu ineqarnermut sulinngiffeqarluni angalanernut allanullu akileraaruteqarfiulersussanut.
Tamannalu pissaaq Akileraartarnermut atugarissaarnermullu ataatsimiititaliap inassutai politikerinit piviusunngortinneqarpata.
Akileraariaaseq taamatut isikkoqarluni siunnersuutigineqartoq ilaqutariinnut ataasiakkaannut qanoq kinguneqassava.
Tamanna imaaliallaannarlugu akineqarsinnaanngilaq, isertitanit akileraartarneq kisimi allanngortinneqarnianngimmat.
Ineqarnermut tapiissutit allanngortinneqassapput,aammalu sulinngiffeqarnermi angalanermi tapiissutit akileraaruserneqartarnissaat siunnersuutigineqarpoq.
Ilaqutaariit ataasikkaat eqqorneqartussaat assersuuisarissagutsigit, anaanaq kisimiittoq ataatsimik meeralik inissiami attartukkami 50 kvmeterisut annertutigisumi najugaqartup allannguut malugissavaa tassani apeqqutaalluni apeqqutaalluni sumi sulineq.
Assersuutigigaannimi ilinniarsimanngitsutut SIK malillugu akissarsiaqaraanni,qaammamullu 11500 Koruuninik akissarsiaqarluni taava akileraartarnermut inissiinissamut siunnersuut atuutilissagaluarpat iluanaaruteqartussaavoq. tassami annikinnerusumik akileraaruteqartussaavoq, ineqarnermummi tapisiani tigummiinnartussaavai saniatigullu meeqqanut tapisiaqartinneqassalluni.
Taamaalillunilu qaammamut nerisassarsinissaminut 600 koruuninik akissaqarnerulissalluni.
Annertorujussuanngikkaluarpoq, kisianni aningaasat taakku ukiumut iluanaarutigisassai ukiumut katikkaanni 7000 koruunit sinneqarput.
Taamaattumillu allannguineq annertuumik pineqartumi malugineqarsinnaavoq.
Anaananarli kisimiittoq meeralik AC-p isumaqatigiissutaanik aningaasarsiaqartoq, assersuutigalugu Namminersorlutik Oqartussat fuldmægtigitut sulisoq SIK malillugu aningaasarsiallip iluanaarutaata missaanik annaasaqartussaavoq. Tassami ukiumut naatsorsorlugu 7000 koruuninik taamatut inissiinissaq annasaqaatigissagamiuk.
Tassami akileraartarnermigut annikinnerusumik akileeraartaleraluarluni, ineqarnermut meeqqamullu tapit annaasussanngussagamigit.
Assersuutit marluusut takutippaat ineqarnermut tapini annertuumik assigiinngitsoqartoq.
Akileraarut 37 procentinngortinneqassappat kisitsisit takutippaat isertitakinnerusut isertitaqqortunerillu iluanaaruteqassasut, taakkulu akornanni inissisimasut annaasaqaatigissagaat.
