Akileraarutip appartinneqarnissaa Sulisitsisut Kattuffiata SIK-llu isumaqataaffigaat
SIK-p siulittaasua Jess G. Berthelsen oqarpoq Akileraartarnermut Atugarissaarnermullu ataatsimiititaliap inassuteqaataasa ilaat akileraarummik appaanissap piviusunngornissaa ilimaginngikkaluarlugu ilaasortaminut iluaqutaasinnaassasoq.
- Innersuusiortut naatsorsorsimagunikku aningaasat taamak amerlatigisut akileraarusiinikkut taamak amerlatigisut aaneqarsinnaanissaat naatsorsorsimagunikku illuatungaani aappaatigullu sulinermi akileraarut 37-imut apparlugu, nunatsinni tamatta naammaginartumik isumaginninnermut peqqinnissaqarnermullu naammaginartumik isumagineqarnissarput, tassanilu aamma aningaasat naammaginartut pissarsiarineqarnissaat akileraarutit atorlugit. Akileraarut 37 procentimut appartinneqassappat ilaasortatta pisissutigisinnaasaat aamma qaffasinnerulissapput, Jess G. Berthelsen oqarpoq.
GA-p siulittaasua Henrik Leth oqarpoq, ataatsimiititaliarsuup inassuteqaataa atorluarneqarsinnaasoq, Inatsisartunilu ataatsimiinnermi eqqartorneqarnissaa qilanaaralugu.
- Akileraarut qanoq annertussuseqassanersoq naatsorsorluartariaqarparput, akileraarummik allanngortitsinissaq siunissaq ungasinnerusoq eqqarsaatigalugu ajornartorsiutaanngilaq nutsernissarliuna ajornartorsiutaasinnaasoq. Kisianni ajornavianngilaq inigisamut akiligassarpassuaqanngikkaanni akileraarummik milliliinissaq ajornartorsiutaanavianngilaq, akileraarutit aaqqissuuteqqinneqarneranni aningaasartuutit isertitallu oqimaaqatigiissammata, Henrik Leth oqarpoq. Aamma oqarpoq akiitsut ikilisinniarlugit KiffaqKontomik pilersitsineq, tassa inuiaqatigiit akissarsiaat akiligassanik ilanngaaffigereerlugit aningaasaataasa sinneri kontomut ikineqartarnissaat pisortanut akiitsut ikiliartornissaat tunngavigalugu tapersersorlugu.
