Akileraarutinut atugarissaarnermullu ataatsimiititaliaq inuttalersorneqarpoq
Ataatsimiititaliap akileraarutaasartut, akitsuutit, atugarissaarnissamullu aningaasartuutit misissuiffigissavaat, kingunerisaanillu inuiaat qanoq atugarissaarnerulernissaanik innersuussissallutik.
Ataatsimiititaliaq tallimanik ilaasortaqassaaq. Siulittaasutullu toqqarneqartoq tassaavoq Torben Andersen, naalagaaffiup aningaasaqarneranut ilisimatooq, taannalumi Danmarkimi atugarissaarnissamut ataatsimiititaliami siornatigut siulittaasuusimavoq.
Ataatsimiititaliami ilaasortat sinneri ukuupput: Magga Fencker Qaasuitsup kommuunianeersoq, Nina Banerjee inooqatigiit pissusaannik ilisimatusarsimasoq, siornatigullu MIPI-mi, tassa meeqqanut inuusuttunullu ilisimasaqarfimmi sullissisuusimasoq, Peter Schultz Naalakkersuisoqarfimmeersoq, kiisalu Peder Andersen, Danmarkimi inuussutissat aningaasarsiutaanerannut instituttimi ilinniartitsisuusoq.
Ataatsimiititaliap ilaasortaasa inatsisilerinermik, aningaasarsiornermik, inuiaqatigiillu akornanni pissutsinik ilisimasaqarnerat, allaffissornikkullu paasisimasaqarluarnerat pingaartinneqartoq naalakkersuisut tusagassiuutinut nalunaarutaani takuneqarsinnaavoq. Ataatsimiititaliami sulinermi kommuunit akuulluarsinnaanerat pingaartinneqarportaaq.
Ataatsimiititaliaq nutaaq novembarip 14-anni 15-iannilu ataatsimeeqqaassaaq, aappaagulu upernaakkut qanoq ingerlanertik nalunaarusiussallugu, 2011-milu februaarimi isumaliutissiissummik inaarutaasumik saqqummiissapput.
