Akileraarutinit 147 millioni koruunit utertoorutaassapput
Aningaasat katillugit 147 millioni koruunit utertoorutaassapput, siorna 9 millioninik amerlanerullutik 158 millioni koruuniusut. Akileraarutileriffiit kommuniniikkunnaarlutik aqutsisoqarfimmut siorna nuummatali aatsaat aappassaa aqutsisoqarfik ukiumoortumik naaatsorsuusiorpoq.
Utertoorutissat tassa 146.989.827 koruuniupput, taakkunanngalu 42 millioni koruunit akiligassallit pissaraluinit ilanngaatigineqarput, tassaallutik pisortanut akiitsut: akileraarutinut, INI-mut, kommuninut, Nukissiorfinnut allanulluunniit akiitsut. Kommunit amerlanerpaanik pissaqarlutik 28 millioni koruuninik, Inissiaatileqatigiiffik INI 8 millioninik kiisalu Namminersorlutik Oqartussat 6 millioninik ilanngaassunneqarput. Akileraartarnermut Aqutsisoqarfimmi akileraaruseriffimmi pisortaq Claus Stensgaard Jensen taama ullumi ilisimatitsivoq.
Utertoorutit taamaalillutik akiitsunut ilanngaatit peereerlugit 105 millioni koruunit sapaatip-akunnerani matumani inuiaqatigiinni kaaviiaartinneqalissapput. Siusinnerpaamimmi aningaaserivinni kontonut ikiseqqusisismasut pissatik tallimanngorpat aggustip ulluisa 28-anni tigusinnaassavaat, kontomullu ikisitseqqusunngitsut utertoorutissatik checkinngorlugit piffissami qaninnermi aamma tigussavaat.
Utertoortuinnaanngillalli, tassami innuttaasut 2008-imi akileraarnikippallaarsimasut 43 millioni koruuninik akiligassinneqarput, qaammatini tullerni, septembarimi, oktobarimi novembarimilu akilersugassaminnik. Siorna akiligassat 80 millioni koruuniupput.