Akileraarutinik Aqutsisoqarfik Qaqortumi millionilinnik akiliisitsivoq

Akileraarutinik aqutsisoqarfik ulluni pingasuni Qaqortumiinnermini sulisitsisunit, akileraarutinut A-nut, ilaalu ilanngullugit, akiligassalinnit, katillugit 2,8 millioni koruunit akilersissimavai. Aamma arlalinnik akilersuinissamik isumaqatigiissuteqarsimasoq, Sermitsiami allaaserineqarpoq.
maajip 10-at 2009 13:24

Aqutsisoqarffiup kisitsisini siullermik saqqummiussaani illoqarfimmi sulisitsisut akiligassaat katillugit 16,3 millioni koruuniusimagaluarput. Akileraarutinilli aqutsisoqarfiup 762.000 koruunit naatsorsuutinut kukkusumik allassimavai. Ilanngullugulu akiligassat ilaat 2,3 millioni koruunit akiliisinnaajunnaarsumeerput, taamaalillunilu sulisitsisut akiligassaat 13 millioni koruunit missaaniilerlutik.

Akileraarutinik aqutsisoqarfiup Qaqortumiinnermini 2,8 millioni koruunit pissarsiaasa saniatigut piumasarineqarsimavoq illuutit qularnaveeqquserneqarnissaat, qulakkeerniarlugu aningaasat akiligassat akilerneqarnissaat. Aqutsisoqarfiup aallartitaasa Qaqortumi sulisitsisut katillugit 28-t pulaarpai.

- Angusavut naammagisimaarpavut, Akileraarutinik aqutsisoqarfiup pisortaa, Claus Stensgaard Jensen, oqarpoq.

Aallartitat Nanortalimmut Narsamullu ingerlaqqipput. Aasaaneranilu sulinngiffeqarfiup kingorna Ilulissat Aasiaallu tikeraarneqassapput. Tamannalu tassa Sermitsiami atuarneqarsinnaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq