Akileraarut appartinneqassaaq
Sulinermut akileraarut januaarip aallaqqaataata kingorna procentimik ataatsimik apparneqassaaq, tamannalu januaarimi akissarsinermi sulisartunut malunnaataassaaq pitsaasoq.
Oqartussanulli malunnaatissaa tassaavoq, akileraartarnermit isertitat 72 million koruuninik ikilineri. Tamannali matussuserniarlugu akitsuusiinerit arlallit pilersinneqarput ilaatigut makkuusut.
Qalerallit sinerissap avataani pisarineqartartut, Nunatsinnilu suliareqqaarneqaratik nunanut allanut aallarunneqartartut akitsuuserneqarput.
Utaqqiisaasumik inigitinneqartartut atorneqarneri akileraaruserneqassapput, taamaaliornikkut utaqqiisaasumik ineqarnermi akiliisoqartalissalluni.
Biilit Nunatsinnut eqqunneqartut akitsuuseqqinneqarput.
Akileraartarneq pillugu allannguut, Siumumit Atassummillu akuerineqaratik taasinermi isumaqatigineqanngillat. Isumaqataannginnerannut pissutaaneruvoq, akileraarutip 1 procentimik apparneqarneranni tamanna akissaatikinnernut iluaqutaassannginneranik partiit illuatungiliuttut isumaqaramik.
Siumup siunersuutigigaluarpaa, akileraarut apparnagu inummut ilanngaat qaffanneqartariaqartoq, tamannali Inatsisartuni amerlanerussuteqartunit isumaqatigineqanngilaq.
