Akileraaruserinermik sullissineq pisariillisarniarneqarpoq

Akileraaruserinermik akitsuutilerinermilu sullissineq Akileraartarnermut Pisortaqarfiup ukiortaamit suliassarilissavaa.

Innuttaasut akileraaruserinermik sullinneqarnerat aqutsisoqarfinnik eqiterisoqarneratigut pisariillisarniarneqarpoq. Inatsisartut ukiaq ataatsimiinneranni akileraaruserinermik sullissinerup ukiortaamit allanngortiterneqarnissaa aalajangiunneqarpoq.

Akileraaruserineq maannamut kommuninit akisussaaffigineqarsimavoq, ukiulli massuma naanerani kommunini akileraartarnermut allaffeqarfiit matuneqassapput, immikkoortortaqarfiillu allaffeqarfiinik sisamanik pilersitsisoqassalluni.

Nuummi qitiusumik allaffeqarfeqassaaq, illoqarfiillu Ilulissat, Sisimiut, Nuuk aamma Qaqortoq immikkoortortaqarfeqassallutik.

Akileraarutit imaluunniit akitsuutit pillugit apeqquteqassagaluaruit Akileraartarnermut Pisortaqarfimmut immikkoortortalli allaffeqarfiinut saaffiginnittalissaatit.

Kommunini immikkoortortaqarfeqanngitsuni sumiiffinni pineqartuni atortorissaarutit nutaaliat aqqutigalugit immikkoortortaqarfimmut toqqqaannartumik attaveqartoqarsinnaassaaq.

Kommunit sorliit immikkoortortaqarfinnut sorlernut inissinneqarsimanersut KNR-ip internetikkut nittartagaannut isernikkut alakkartersinnaavoq.