Akileraaruserineq pisariillisarniarpaat

Akileraaruserinermik sullissineq aappagu januaarip aallaqqaataanit atuutilersussamik allanngussaaq.

Akileraaruserineq kommuninit maannamut ingerlanneqarsimasoq, akileraartarnermut pisortaqarfimmit akisussaaffigineqalissaaq.

Inatsisartut ukiaq ataatsimiinneranni tamanna aalajangerneqarpoq.

Akileraarusernermi illoqarfiit immikkoortortaqarfillit sisamaassapput, tassa Qaqortoq, Nuuk, Sisimiut kiisalu Ilulissat immikkoortortani qitiussagamik.

Taamaaliornikkut innuttaasut sullinneqarnerat pisariillisarniarneqarpoq, pitsaanerusumillu sullissisoqarniarluni, Akileraartarnermut Pisortaqarfimmi immikkoortortami pisortaq Siverth Larsen oqarpoq:

- Nunatsinni kommunit innuttaqqortusaat aallaavigalugit assigiikannersumik agguaanissarput siunnerfigisimavarput, taamaalinikkut innuttaasut pitsaanerusumik sullinneqarnissaat anguneqarsinnaassammat, Siverth Larsen oqarpoq, nangillunilu:

- Immikkoortortaqarfiit kommunerujussuanngortussallu imminnut attuumassuseqanngillat. Uagut taamatut immikkoortiterisimanitsinnut aallaavigaarput illoqarfiit immikkoortortap illoqarfiata pingaarnersaannut qanittuunissaat. Akileraartartut sullinneqarnerat pitsaanerulissaaq, ingerlatsinerlu pitsaanerulissallunilu, Siverth Larsen oqarpoq.

Kommunini immikkoortaqarfeqanngitsuni atortorissaarutit nutaaliat ikkussuunneqassapput, allaffeqarfeqanngikkaluarluni sumiiffigisamit immikkoortortaqarfimmut attaveqartoqarsinnaaniassammat.

Akileraaruseriffik pillugu annertunerusumik paasisaqarusukkuit internetikkut nittartakkatigut alakkarsinnaavat.

Adressia tassaavoq W-eersuit pingasut, naggat, akipi, naggat, gl, titarneq uingasoq akileraaruseriffik.