Akileraaruseriffiit qitiusumut nuunneqarneri ajornartorsiutigineqarput
Kommunit namminneerlutik akisussaaffigisimasaasa, akileraaruseriffiit, qitiusumut nuunneqarneri Kujataani kommunit pingasuusut ataatsimoorlutik annertuumik ajornartorsiutigaat. Kommunimmi akileraarutinit isertitassarpassui tamatuma kingunerisaanik amigaatigineqarput kiisalu kommunit akiliisinnaassusiannut takunnissinnaaneq ajornakusoorluni taamaalillunilu ukiuni aggersuni isertitassanut missingersuusiorniarneq pisinnaasarani.
aggustip 22-at 2007 15:40
Akileraaruseriffiit qitiusumut nuunneqarnerinut atatillugu misilittakkat pitsaanngitsut tunngavigalugit Kujataani Kommunit Peqatigiiffiata kajumissaarutigaa, akiliisitsiniartarfiup kommunit kattunnissaasa tungaannut qitiusumut nuunniarneqarnera unitsikkallarneqassasoq. Taarsiullugu Kujataani kommunit kissaatigaat akiliisitsiniartarfinnut kiisalu akileraartarnermut immikkoortortaqarfiit kommuninngortussanut nunap immikkoortuinut tunniunneqarnissaat.
Kujataani Kommunit Peqatigiiffiata paasiuminaatsippaa, taama pingaaruteqartigisup qitiusumut nuutsinneqarnissaa sumut iluaqutaassanersoq, tassami sumiiffimmi ilisimaarinninneq pingaaruteqarluinnarmat.
