Akileraartartut tunissutisiartik namminneq akilissavaat
Digitalimik nassitsissutit atorlugit tv-kkut kanaalit sisamat isiginnaarneqarsinnaalernissaat akileraartartunit akilerneqassaaq.
Digitalit ikkkussorneqarnerannut Tele Greenlandimut akiliisoqartussaavoq. Namminersorlutik Oqartussat inissiaataanni attartortut TV-kkut isiginnaarsinnaanissamut atortussaat tigoraassutit 7000-it tunniuneqartussaapput. Taakkua ukiumi nutaami tikippata atorneqalerpatalu, atuisut inimik akiliutigisaannit akilerneqassapput.
Sapaatiuppat TV-kkut isiginnaarneqarsinnaalersussat isiginnaartartunit qassinit isiginnaarneqassanersut manna tikillugu ilisimaneqanngilaq.
Attaveqarnermut Naalakkersuisup Jens B. Frederiksenip tigooraassutit dekoderit inissiaatileqatigiiffimmi INI A/S-imi attartortunut tunnissutitut taasai 7000iusut, piffissaq eqqorlugu tikinngillat.
TV-kkut isiginnaarnissamut tigooraassutit pisiarineqarnissaanut siumoorluni akiliutigineqartut najugaqartut immikkoortortaqarfiinit akilerneqarput.
Najugaqartut iniminnut akiliutigisartagaat qaffanneqassanngillat, kisiannili immikkortortaqarfiit sinneqartoorutaannit akilerneqassallutik.
Tigooraassutit sapaatiuppamut anngutinngitsoornerat asuli neriorsuilussinnaarneruvoq.
Attaveqarnermut Naalakkersuisoq Jens B. Frederiksen novemberip ulluisa arfineq-pingajunanni tusagassiuutinut nalunaaruteqarluni adventip sapaataanni siullermi tunissummut qilanaartuusiivoq:
- Ilaqutariit amerlanersaat assigalugit adventip sapaataat siulleq ulloq immikkut ittumik aliannaarsaaqatigiinnermut atortarparput, aammalu adventskransi igalaanilu juullip ulloriai ikittarpavut. Taamaattumik ulloq taanna tv-kanalit nutaat atoqqaartinneqarnissaannut naleqquppoq. Uanga aallakaatitat assitaasa pitsaanerulernissaat qilanaaraara, meeqqamalu ”Ramasjang” isiginnaarsinnaalissagamikku qilanaaraat, Jens B. Frederiksen ullut 14-it matuma siornatigut taamatut oqarpoq.
Kisiat tassa apeqqutinngorpoq Digital TV sapaatiuppat aallartippat isiginnaartartut qassit isiginnaarsinnaassanersut. Tigooraassutit 7000-it piffissaq eqqorlugu tikinngillat, aamma apeqqutinngorpoq antennit sorliit atorneqassanersut, manna tikillugu erseqqissumik paasissutissiissutigineqanngimmat.
Tigooraassutit 7000-it piffissaq eqqorlugu tikinnginnerat Jens B. Frederiksenip oqaaseqarfigiumanngilaa, taassumap oqarnera malillugu Digital TV-kkut isiginnaarsinnaalernissaq pingaarneruvoq, taannalu sapaatiuppat aallartissaaq. Ajornartorsiutilli kingunerisinnerusukkut takkukkumaartut aaqqinneqarumaartut oqaatigalugu.
Tigooraassutit inniminnerneqarnerat pisiarineqarnerat piffissarlu eqqorlugu tikissimannginnerat Jens B. Frederiksenimit oqaaseqarfigiumaneqanngilaq. Taanna atorfilittaminut inissiaatileqatigiiffimmullu INI a/s-imut innersuussivoq, taakkuali aamma erseqqissumik akissutissamik nassuiaateqarsinnaanngillat.
Tigooraassutit dekoderit 7000-it pisiarineqarneranni Kalaallit Nunaanni niuertarfiit tamakkuninnga tuniniaasut sooq pisiffigineqarsimannginerannut apeqqut Namminersorlutik Oqartussanit aamma akineqanngilaq. Aammalu taakkua ajoquteqalerpata kikkunnit iluarsartuunneqarsinnaanerat suli nalunarluni.
Namminersorlutik Oqartussat inissiaataanni attartortut qassit tigooraassutinik dekoderinik soqutiginninnersut atuilerisunnersullu aperineqarsimanersut aamma akissutissartaqanngilaq.
