Akileraartarnerup eqqartornissaa qineqqusaartut soqutigeqaat
Inuit Ataqatigiit akileraartarneq pillugu ataatsimiititaliarsuarmik pilersitsinissamik ullualuit qaangiuttut
siunnersuuteqarmata, siulliusutut pissusilersornerarlugit Aningaaaqarnermut Naalakkersuisoq Per Berthelsen tupigusuppoq.
- Qaammatit marlungajaat qangiupput tusagassiortunik aggersaagama, oqaluttuariniarlugu, Akileraartarneq pillugu ataatsimiititaliarsuarmik Naalakkersuisut pilersitsiniartut, Per Berthelsen oqarpoq.
Naalakkersuisut ataatsimiititaliarsuarmut suliakkiutissatut missigiussaanni ilaatigut allaqqavoq, issuarparpullu:
Naalakkersuisut isumaqarput sulineq, suliffeqarfinnik ingerlatsineq aammalu Kalaallit Nunaanni aningaasaliissuteqarneq imminut akilersinnaasariaqartut. Taamaammat sulinikkut, suliffeqarfinni ingerlatseqatigiiffinnilu isertitanik qularnaatsumik akileraarusersuineq inuiaqatigiinni atugarissaarfiusuni allani akileraarusersuinermut sanilliussinermi unammilliutaasinnaasariaqarpoq.
Inuit Ataqatigiit ataatsimiititaliarsuarmik pilersitsinissamut piareersimanertik tungavilersorpaat, Nunatsinni akileraariaatsip misissornissaa piffissanngortoq.
Takkua ilaatigut siunnmersuutigaat, inuiaqatigiit pisuussutaannik atuinermik akitsuusersuisarneq misissoqqinneqassasoq. Partiip aamma isertitakinnerit akunnattumillu isertitallit aamma misissorusuppaat. Aamma sulinermi isertitaqartarnerup pisortanillu ikiorsiissutit imminnut aporaaffii misissoqqissaartariaqartut Inuit Ataqatigiit isumaqarput.
Demokratineersoq Palle Christiansen isumaqataavoq, erseqqisarluguli, inuiaqatigiit pigisaasa agguaanneqartarnerisa allanngortinnissaat Inuit Ataqatigiit akuttunngitsumik oqaluuserisaraat, qanorpiarli iliortoqassanersoq suli siunersuuteqaratik.
- Alliartuaartumik akileraartarneq Inuit Ataqatigiit siornatigut oqaluuserisarpaat, maannali qineqqusartoqaleriarmat taanna tunuarteriataarpaat. Taava akileraartarneq pillugu ataatsimiititarsualiornissaq annanniutigaat. Demokraatiniilli paaserusoqaarput, Inuit Ataqatigiit ataatsimiititaliarsualiornikkut sorusunersut, uagummi sulinermit isertitanit akileraarutit appartikkusuppavut, Palle Christiansen Demokraatineersoq oqarpoq.
Partiit Inatsisartunut qinigassanngortitsisut arlaannaalluunnit akileraarutinik qaffaaniarluni siunnersuuteqanngilaq.