Akileraartarnermut nalimmassaanerit pillugit misissueqqissaarneq naammassingajalerpoq
-Misissueqqissaarnerput naammassingajalerpoq, taannalu Naalakkersuisunut Kalaallit Nunaannilu Kommunit Kattuffiannut, KANUKOKA-mut, tunniutissavarput, Akileraartarnermut Pisortaqarfimmi pisortaq, Kaare Hagemann, ilisimatitsivoq.
-Agguataarinissaq nalunngisatsitut januaarip ulluisa aallaqqaataanni 2009-mi atuutilersussaavoq, taamaattumik oqartoqarsinnaanngilaq suliarput kinguartooqqasoq, suliaq pilersaarutit malillugit ingerlavoq, Kaare Hagemann oqarpoq, nangillunilu:
-Tunngaviusut maannakkutut iinnangajassapput, tassa aningaasaateqarnerusup sinneqartoorutini aningaasaatikinnerusumut pilliutigisassavai. Tamannalu nalunngilluinnarparput, soorlu kommunit akornanni ataatsimoortumik tapiissutit qanoq agguataarneqarnissaat eqqaassagutsigu.
Tassa naatsorsuutit atuutilersussat annertuumik allannguuteqassanngillat. Assigiinngissutaat unaaginnarpoq kommunit 18-it sullikkunnaarlugit kommunit anginerusut sisamat sullisilissagatsigik.
Illuatungaatigulli oqaatigissavara kommunit sisamat sullisilerutsigik aqutsineq ajornannginnerujussuanngussammat.
-Unali ilanngullugu oqaatigilara; Kommunerujussuanngortussat akisussaaffissatik, Kommunit aaqqissuuteqqinnissaannut ataatsimiititaliap piumasai, aalajangereerpatigik, nalimmassaanissaq aatsaat inissikkumaarmat, Akileraartarnermut Pisortaqarfimmi pisortaq, Kaare Hagemann, naggasiivoq.