Akileraartarnermut aqutsisoqarfiup sulisut qulit nuulerpai
Akileraartarnermut aqutsisoqarfiup sulisuni qulit ippassaq nalunaarfigai illoqarfinnut allanut nuuttariaqartut, isummernissaannullu ullunik tallimanik periarfissillugit, nuukkumanngippatalu tamanna soraarniutitut isigineqassasoq allaffigineqarlutik.
- Aningaasaqarnermut inatsisissap 2011-moortup suliarineqarnerani Namminersorlutik Oqartussat aqutsisoqarfiani sipaaruteqartoqarnissaa pisariaqarsimavoq, Aningaasaqarnermut Sulisoqarnermullu aqutsisoqarfiat atorfillit kattuffiannut AK-mut ippassaq taama allagaqaateqarput.
Sulisut piumasaqaataasut malissinnaanngippassuk soraarsitaanissaat inatsisitigut unioqqutitsinerusoq, Atorfillit Kattuffianni siulittaasoq Erik Hammeken oqarpoq, nangillunilu:
- Ullunik tallimaannarnik piffissalerlugit pinngitsaalillugit nuutsinniarneqarnerat pissusissamisuunngilluinnarpoq akuerineqarsinnaananilu.
Tunngaviusumik inatsit najoqqutaralugu paragraf 27 immikkoortoq 3-mi ima allassimavoq:
- Tjenestemanditut atorfillit nuutsinniarneqartut pinngitsooratik qinigassinneqartussaapput, nuutsinneqassagunillu maleruagassat malillugit pension-ilerlugit nuutsinneqartussaallutik, Erik Hammeken issuaavoq.
Akileraartarnermut Aqutsisoqarfiup pisortaa, Morten Kahlke sulisuminut ima allappoq:
- Atorfillit atorfilittatullu inatsisit malillugit pisussaapput suliffimminniit nuutsitaasinnaallutik, nuutsitaanissaq akuerineqanngippat tamanna paasineqassaaq soraarniuteqarnermik.
Sulisut illoqarfimmut allamut nuuttariaqartut illoqarfinniit mikinerusuninngaanneerput, nooqquneqartullu amerlanersaat namminneerlutik illumik pisinikuullutik. Illoqarfinnut annernut nuunnissaat inuunerannik allannguinermik kinguneqartussaavoq. Taamaattorli qinnuvigineqartut periarfissinneqanngillat.
- Nooqquneqartut amerlanerit namminneq illuliornikuupput, tamannaannarluunniit eqqarsaatigalugu, ullunik tallimaannarnik periarfissinneqarnerat pissusissamisuunngilluinnaqqissaarpoq, taama oqarpoq Erik Hammeken.
Sulisut nooqquneqartut avannaani illoqarfinnit tallimaninngaanneersuupput, taakkulu Maniitsumut nuutsitaasussaallutik. Nanortalimmi sulisut Qaqortumi Akileraartarnermut Pisortaqarfiup allaffeqarfianut nuunnissaat neqeroorutaavoq.
