Akileraartarneq pillugu isumalioqatigiissitaliorusupput

Akileraariaatsip innuttaasut nunallu karsiata akissaqassusaanut sunniutaasa misissoqqissaarneqarnissaa isumalioqatigiissitami suliarineqassasoq siunnersuutigineqarluni.

Pisuussutinik inuiaqatigiit ataatsimut pigisaannik atuinermut qanoq akiliuteqartoqassanersoq qulaajaasoqarnissaq Inuit Ataqatigiinnit kissaatigineqarpoq taamatullu akissarsiakinnerit akunnattumillu isertitaqartut inuuniarnikkut atugarisaannut akileraariaatsip sunniutai aammalu sulinermi akissarsiat pisortanillu ikiuutitut pissarsiarineqarsinnaasut aporaannerisa qulajaarneqarnisaat kissaatigineqarluni, Inuit Ataqatigiit inatsisartunut qinigassanngortitaat Josef Motzfeldt nalunaarpoq. Josef Motzfeldt isumaqarpoq akileraarutitigut akitsuutitigullu maannakkut akiliutigineqartartut annertunerunissaat partiimit kissaatigineqanngimmat.

Ukiut sisamat matuma siornatigut Kalaallit Nunaanni akileraartitseriaatsip nunani allani pissutsinut sanillillugu misissuiffigineqarnerata naammassineranit, tamannalu pillugu Inuit Ataqatigiit siunnersuutigaat akileraariaaseq pillugu misissueqqissaartussanik allannguutaasinnaasunillu siunnersuuteqartussamik isumalioqatigiissitaliortoqassasoq.