Akileraartarneq pillugu isumalioqatigiissitaliortoqarnissaa siunnersuutigineqareerpoq

Isumalioqatigiissitamik pilersitsinissamik siunnersuut Inuit Ataqatigiit ippassaq saqqummiuppaat. Akileraarutit pillugit isumaliuteqatigiissitamik pilersitsinissamik siunnersuut, Per Berthelsenip apriilip qaammataani saqqummiuppaa, inatsisartunullu qinersineq nalunaarutigineqarmat.

aningaasaqarnermut ataatsimiititaliamut qinnuteqaatiginissaa angumerineqanngilaq.

- Akileraartarneq pillugu isumalioqatigiissitami suleqataasariaqartutut piukkussat, tassalu soqutigisaqaqatigiit, kattuffiit peqatigiiffiillu attavigereernikuuvakka, aammalu Christen Sørensenip, ministeriunerup Kalaallit Nunaata aningaasaqarneranut ataatsimititaliaani siulittaasusimasup, akileraartarnermut isumalioqatigiissitami siulittaasuunissaa siunnersuutigaarput, Per Berthelsen oqarpoq.

Akileraartarneq pillugu isumalioqatigiissitaliornissami naalakkersuisunut oqallisissiassatut saqqummiunneqartumi, eqqaaneqarpoq akileraartarnerup aaqqissuuteqqinneqarnerani akileraaruserinermi allaffissornerup pisortallu pisassarisaannik akiliisitsiniartarnerup pisariinnerulernissaanik kissaateqarneq.

Namminiilernerup kingorna aningaasaqarneq pillugu siunnersuisoqatigiinnik arlaannaannulluunniit pituttorsimanngitsunik ilaasortalinnik pilersitsinissaq Per Berthelsenip kissaatigaa, taannalu kalaallinik qallunaanillu ilaasortaqarnissaa siunnersuutigineqarluni.