Akileraarsimanermut nalunaarfissaq marsip 15-ianut kinguartinneqarpoq

Akileraartarnermi Pisortaqarfimmi qarasaasiatigut ajutoorneq nunatsinnilu allakkatigut pajuttuisarnerup kigaalaarnerujussua pissutaalluni akileraarsimanermut nammineerluni nalunaarsuiffissap tunniunneqarnissaa marsip 15.-ianut kinguartinneqarpoq. Nuup Kommuneani akileraaruseriffiup pisortaa Franklin Høegh-Olsen ima oqarpoq:

- Namminersornerullutik Oqartussat qarasaasiaqarfianinnganiit kommuninut tamanut akileraartartut aqqi nassiussuunneqartussaagaluartut ukioq manna aatsaat januaarip naanerani nassiunneqarsimapput, taamaattumik tunniussiffissaq ulluni 14-ini kinguartinneqarnissa qinnutigisimavarput, akuerineqarlutalu, Franklin Høegh-Olsen nassuiaavoq.

Franklin Høegh-Olsen aamma oqarpoq nunatsinni angallannikkut pissutsit januaarip aallaqqaataaniit allanngornerisa kingunerisaannik allakkat nassiunneqartartut inuttassaminnut apuunniaasaartalersut, kisiannili aamma Nuummi allakkanik pujussuineq kigaalaarnerarpaa:

- Nuup iluani allakkat ingerlaniartarnerat ajornakusoortorujussuusoq paasinikuuarput, tassalu alakkanut boxeqanngikkaanni ullut 14-it tikillugit allakkat Nuussuarmut najugalinnut inuttassaminnut apuunniartarmata kinguartitsiniarnermut pissutaaqataavoq.

Franklin Høegh-lsen naggataatigut oqarpoq 2005-imut akileraarsimanermut nammineerluni nalunaarsuiffissaq kinguartinneqaraluartoq piffissaq kingullerpaaq atortariaqanngikkipput:

- Piffissaqarluarallartilluni saaffiginnikkaanni akileraaruseriffimmi utaqqerujussuarneq pinngitsoorneqarsinnaammat, akileraartartunut siunnersuutigissavara siusissukkut immersuinissamut siunnersortissaagaanni saaffiginninnissaq innersuutigisinnaavara, Franklin Høegh–Olsen oqarpoq.