Akileraarnerujumanngillat

Qaammatit marlussuit matuma siorna Ivittuut Kommuniata kommuninut Kujataamioqatigiinnut ilaasortanngornissi ornigaa - ullumikkulli kisimiikkusulersimavoq.

Sakkutooqarfik Kangilinnguit tamatumunnga patsisaasutut oqaatigineqarpoq. Namminersornerullutilli Oqartussanit uppertitsiniaasoqarsimasoq oqaatigineqarluni.

-Tassa takusinnaasagut tunngavigalugit, Kalaallit Nunaanni kommunit Ivittuut assigiinnginnamigit, imaluunniit immikkooruteqarami. Sakkutooqarfik Kangilinnguit kommuani inissisimavoq.Taamaalilluni sakkutooqarfiup Qallunaat Nunaanni Naalagaaffimmut isumaqatigiissutaanut kommuni imaluunniit Namminersornerullutik Oqartussat akuliussinnaanngillat, Ivittuuni borgmesteri Nukaaraq Hansen oqarpoq.

Kisianni isumaqatigiissutit sorpiaat oqaatigisinnaanngilai, Kangilinnguanili sakkutuut naalagaanerannut Admiral Niel Erik Sørensenimut innersuulluta.

-Uanga qanittuaqqakkut aatsaat maani atorfinikkama Kalaallit Nunaanni pissutsit ilisimavallaanngilakka. Kisianni Illersornissamut Ministereqarfiup pigaatigut 1951-mi isumaqatigiissut naapertorlugu, Niels Erik Sørensen nassuiaavoq.

Taassuma aamma erseqqissarpaa kommunit kattussorneqarpata, soqutiginngikkitsik inuussutissarsiornikkut inunnillu isumagininnikkut akileeqataanissartik.

Namminersornerullutik Oqartussani Nunanut allanut pissutsinut Pisortaqarfiup allaffiani pisortaq Leif Scharling oqarpoq, Kangilinnguit nunatsinni allatuulli immikkooruteqarani nunatsinnut atasoq, aammalu immikkut malittarisassaqartinneqanngitsoq.

Kommunit pinngitsaalillugit kattussorneqassappata Ivittuut Kommuniata akileraarutinut akiliutigisartagaa qaffattariaqassaaq. Ullumikkut akileraarut tamakkerluni 37 procentiuvoq.

Ivittuut Kommuniani kommunalbestyrelsimi ilaasortat pingasut nalinginnaasumik februaarip 20-ani ataatsimiissapput. Tassanilu nalilersussavaat Kujataamioqatigiinnut ilaasortanngussagunik suut pitsaaqutaassanersut.

Ivittuut 176-inik innuttaqarpoq.