akikitsumik oqarasuarneq atorluarneqanngitsoq

Danmarkimi oqarasuaatinik attaveqarnikkut ingerlatsiveqarfiup, Supertel-ip nunatsinnut oqarasuaatikkut attaveqarnermik akikitsumik 2003-mili Tele Greenland suleqatigalugu neqerooruteqarnera atorluarneqanngilaq, taama Supertel-ip pisortaa John Topp oqarpoq.

Supertel Tele Danmarkiusimasutut massakkut TDC-nngortutulli Tele Greenlandimik suleqateqarpoq.

Supertel-ip Danmarkimiit Kalaallit Nunaannut akikitsumik oqarasuaatikkut attaveqarnissamut neqeroorutaa siornaak 2003-imi aallartilluaraluarpoq piffissalli ingerlanerani atuisut soqutiginnissusaat appariartuinnarsimalluni. Supertel-ip Danmarkimiit nunatsinnut oqarasuarnikkut akikitsumik neqeroorutaa minutsimut 2 krone 40 øreqarpoq, TDC-mit 4 kronemik akikinnerulluni. TDC nunatsinnut oqarasuaatikkut attaveqartitsinermini minutsinut 6 krone 75 øreqartitsivoq. Soormitamiuna Supertel-ip neqeroorutaa atorluarneqanngitsoq? John Topp ima nassuiaavoq.

-Kalaallit Danmarkimi najugaqartut amerlassusaat eqqarsaatigissagaanni imaassinnaavoq amerlasuut akikitsumik atuinissamik neqerooruteqarnerput annertunerusumik eqqarsaatigisimanngikkaat. Kalaallit Nunaanni suliffeqarfiit maani suliffeqarfinnik allanik suleqateqarnerat aamma peqqutaasimasinnaavoq. Taakku neqerooruteqarfigisarsimagaluarpagut, aamma soorlu kalaallit Danmarkimi peqatigiiffii kiisalu kalaallit Tivolimi aggustip aallaqqaataasiortarnerinut atatillugu neqerooruteqartarluta, John Topp oqarpoq. Supertel-ip pisortaa John Topp oqarpoq Danmarkimiit nunatsinnut oqarasuaatikkut attaveqarnerup 10 procentia Supertel-imit ingerlanneqartoq.