Akikinnerusumik angalasinnaaneq oqilisarneqartariaqarpoq
Angallanniarnerup innuttaasunut Nanortalimmi akisunerulersimanera iliuuseqarfigeqqullugu, timmisartornermi akitsuutit ilaannik tamakkiisumilluunnit piiaaqqusilluni, Nanortalimmi borgmesteri Kristine Raahauge naalakkersuisunut inatsisartunullu ilaasortanut ammasumik allagaqarpoq.
- Angallanneq pillugu aaqqissuusseqqinnermi ajornartorsiutaalerpoq timmisartuussineq kisimi tapiiffigineqartalermat. Taammaammat tamanna allanngorteqqullugu ilaatigut timmisartuussinermi akutsuutip ilaa tamakkiisumilluunniit peersinneqarnissaanik kaammattuillunga inatsisartunut ilaasortanut naalakkersisunullu ammasumik allagaqarpunga. Timmisartuutileqatigiit akinik appaagaluartoq, akit suli qaffaseqaat, Kristine Raahauge, Nanortalimmi borgmesteri oqarpoq.
Kristine Raahauge aamma isumaqarpoq, inuit angallannikkut oqilisaaffigineqartarnissaat oqartussaasut pisussaaffigigaat, nunanilu allani innuttaasut ajornannginnerusumik angalasinnaanissaanik pisortat oqilisaaqataasartut erseqqissaatigaa, naggasiutigalugu oqarpoq, nunatta aamma akissaqartittariaqaraa, inuit akikinnerusumik angalasinnaalernissaat.
Nanortalimmi borgmesteri Kristine Raahauge Louise Hansen-imit apersorneqarluni taama oqarpoq.
Kristine Raahauge aamma oqarpoq helikopterimi ilaanermi bilitsip akianit 591 koruuniusumit akitsuut 141 koruuniusoq.
Air Greenland-imi allaffissornermi pisortaq Flemming Knudsen isumaqarpoq timmisartukkkut umiarsuarmilluunniit angalanermi akitsuutit assigiittariaqartut.
- Timmisartornermi akitsuutit peerneqarnissaanik eqqarsarneq ilassilluarsinnaavara, tassami angalaniarnermi akit appasinneruleraangata inuit aamma angalanerorusulertarmata.
Kiffartuussinermik suliaqarnitsinni ileqqorivarput angalanerusoqalersillugu timmisartunik angalatitatsinnik amerlanerulersitsisarneq, Air Greenland-imi allaffissornermik pisortaq Flemming Knudsen naggasiivoq.
