Akikinnerulissanngilaq

INI A/S-p inissiaaterpassuinik attartortut Polaroilip uuliamik 30 ørimik aggustip aallaqqaataanit akikilliliinera malugissanngilaat, akiliutigisartagaat allannguuteqassanngimmat. Air Greenlandillu timmisartuutaanik ilaalluni angalaneq akikinnerulissanngilaq. Royal Arctic Linelu Polaroilip uuliaataanik pisineq ajorami, assartugai akisunerulissanngillat.

Polaroilip uulia nioqqutisartakkani 30 ørimik aggustip aallaqqaataanit akikillivaa. Ippassaq oqaluttuaraarput Nukissiorfiit Naalakkersuisunut kallerup inneranik atuisut akikinnerusumik atuilersinniarlugit qinnuiginnilluni saaffiginnittoq.

KNR Namminersorlutik Oqartussat ingerlatseqatigiiffiinut pingasunut, innuttaasunut attuumassutilerujussuarnut, INI A/S, Air Greenland aamma RAL, saaffiginnippoq paasiniarlugu Polaroil uuliamik nioqqutissaatiminik akikilliliimmat atuisartuminnut akikilliliiniarnersut.

INI A/S Namminersorlutik Oqartussat kommunerujussuillu pingasut inissiaataannik 10.000-it missaannittunik allaffissornikkut isumagisallip Polaroilip uuliamik akikilliliineranut atatillugu attartortunut akikinnerusumik attartortitsilissalluni pilersaaruteqanngilaq.

- Attartortut akikinnerusumik attartortinneqalissanngillat attartortut qaammatikkaartumik kiassarnermut akiliutigigallartagaat appasereeqimmat, INI A/S taama ilaatigut ilisimatitsivoq.

Timmisartuutileqatigiiffik Air Greenland nunatsinni timmissartuussinerminut uuliamik Polaroilimik ilaatigut pisisarpoq, Atlantikulu qulaallugu timmisartuuussisartui ingerlatseqatigiiffinnit nunatsinneersunit nunanillu allaneersunit orserneqartarput. Ingerlatseqatigiiffiit taakku Namminersorlutik Oqartussanit pigineqartuutuulli niuersinnaasanngillat, imaaliallaannarlu niuerutigisaminnik akikilliliisinnaanatik.

- Air Greenlandip orsussamut aningaasartuutigineqartartut ikilisarsinnaangilai, soorlu aamma pisortanit orsussamut tapigitinneqartoq, billetimut tapiliullugu ilanngunneqartartoq akikillaasaavigisinnaanngikkaa, Christian Keldsen Air Greenlandimi niuernermut pisortaq oqarpoq.

Air Greenlandip nunatsinni timmissartuussisarnerminut ikummatissamik pisiffigisartakkani, Mittarfeqarfiit, ataatsimeeqatigissallugu maannakkut pilersaarutigaa.

- Ikummatissamik akikillisaassappat, nunatsinni timmisartuussisarnermi akigitinneqartunut allannguuteqartitsisinnaanersoq nalilersussavarput, Christian Keldsen erseqqissaavoq.

Royal Arctic Line Polaroilip akigitittagaanut nioqqutissaataanullu toqqaannartumik attuumassuteqanngilaq nammineerluni uuliamut tapi aamma nunat allat aningaasaasa nalingisa nikittarnerannut qaammatit tamaasa iluarsiisarami.

Ingerlatitseqatigiiffiup umiarsutai Polarolimit orserneqarneq ajorput, Aalborgip imartaani umiarsuarmit orsussamik usisumit orserneqartaramik. Orsussaq tamaani pisiarineqartoq nunarsuarmi orsussap niuerutigineqarneranut akit tunngaviusarlutik.

- Uuliat assigiinngitsut umiarsuarnik orsuliunneqartartut akii ullormit ullormut allanngorsinnaasarlutik, Jan Scmidt, Royal Arctic Linemeersoq oqarpoq.