Akikillisaaniarneq Mittarfeqarfiit ilisimanngilaat

Mittarfeqarfiit annikillisaaniarnerat, taamaalillutik timmisartornermi akileraarutit akikillinissaannik, timmisartorniaraannilu billitsit aamma akikinnerulernissaannik, Naalakkersuisunut ilaasortap, Jørgen Wæver Johansenip, piumasaqarnera Mittarfeqarfiit ilisimanngilaat. Sermitsiaq naggat gl nittartakkamini ullumi taama allappoq.

- Akileraarutit millisikkusukkaluaqaavut, tamannami kissaatigigaluaqaarput. Iluanaarutitsitsinnilli 5 millioni koruunit nunatta karsianut aappaagu akilertussanngornikuuvavut. Aningaasanut aappaagumut inatsisissamut siunnersuummi tamanna takuneqarsinnaavoq, Mittarfeqarfinni pisortaaneq, Jesper Juhl, Sermitsiamut oqarpoq.

Mittarfeqarfiit missingersuutininni 9 millioni koruunit ukioq mannamut naleqqiullugu aappaagu sipaassavaat. Mittarfeqarfiit 4 millioni koruuninik nunatta karsianit ukioq manna pissarsinikuupput, aappaagumiilli tassa 5 millioni koruuninik namminneq akiliissapput. Pisariillisaanikkut, suliassanik allanngortiterinikkut, amerlanerujartuinartullu timmisartumik angalarusunnerulernerisigut, aningaasat taakku nassaarineqarsinnaasimapput. Mittarfeqarfinnut naalagaaffimmit tapiissutit ukiuni kingullerni aamma ikiliartorsimapput.

- 5 millioni koruunit eqqartorneqartut akileraarutit appartinneqarnissaannut atorneqarsinnaanerat Naalakkersuisut qinersinnaagaluarpaat. Akileraarutimmi annertussusissaat politikerit aalajangertarpaat, Jesper Juhl oqarpoq.