Akiitsutoqqat Qaasuitsup Kommuniata karsia artorsartippaat

Kommunit siornatigut arfineq-pingasuusut akileraartarnermut pisortaqarfiup nalunaarutaa kingulleq naapertorlugu ukiuni 2005-2007-imi akileraarutinik amerlavallaanik katillugit 78 mio. kr.-nik tigusaqarsimapput, taakkulu kommunerujussuanngortumit 2009-mit utertillugit akilerneqarsimapput.

Maanna paasinarsivoq kommunit Qaasuitsup Kommuniani kattuttut, ukiuni pineqartuni akileraarutinik amerlavallaanik tigusaqarsimasut, taama AG ullumi saqqummersoq allaaserinnippoq.

Utertitsisussanngorneq kommunerujussuanngortumut artukiissaaq.

- Akileraartarnermut oqartussanit juunimi nalunaarfigineqarpugut ukiunut pingasunut pineqartunut akileraarutinik suli 28 mio. kr.-nik utertitsissasugut. Taamaalillutik akileraarutitigut iluarsiissutit tamarmiusut 2005-2007-imut tunngasut 78 mio. kr.-nik amerlassuseqalerput. Taakku aningaasarpassuupput, Qaasuitsup Kommuniani 2008-mi akileraarutitigut isertitat tamarmiusut 360 millioner koruuninik amerlassuseqarsimanerat eqqarsaatigalugu, kommunaldirektør Sigvard Hvidsteen oqarpoq.

Qaasuitsup Kommuniani kommunalbestyrelsi apriilimi missingersuutiminik iluarsiissuteqartariaqarsimavoq 48 millioner koruunit sipaarniutigineqartussanngorlugit kiisalu akileraarutitigut iluarsiissutit taaneqartut kommunillu pissarsiassai amerliartortuartut, kommunimit aamma aningaasalersorneqartariaqartut, pissutigalugit kommunimi akiliisinnaassuseq tatineqarmat 60 mio. kr.-nik tigoriaannarnik taarsigassarsisoqarsinnaaqqullugu.

Taamaattorli aningaasat kommunip pissarsiassai suli amerliartupiloorput - 2009-ip aallartinnerani akiitsut tamarmiusut 225 mio.kr.-nik amerlassuseqarsimasut 2009-mi ukiup affaani siullermi 15-20 mio.kr.-nik qaffassimasut, AG-p allaaseraa.