Nunatsinni innuttaasut kommuninut akiitsui katillugit 683 millioni koruuniupput. Nanortalimmi innuttaasut kommunimut 21,6 millioninik akiitsoqarput, ukioqanngitsuninngaanniit utoqqarsuarnut agguaqatigiisillugu inuk ataaseq 9.300 koruuninik akiitsoqarluni.
Borgmesteri Kristine Raahauge oqarpoq, akiitsorpassuit pitsanngorsaanissanut sanaartornissanullu killiliisartut.
- Soorunami aningaasat taakku killiliisarput, karsimilu kaaviiaartitassatsinnut aporfiusarlutik. Assersuutigalugu uersakkanut akiliussigallartarnerput aningaasanut allanut atugassaagaluatsinnut killiliisarput. Ingammik sanaartornermut aningaasat atorneqarsinnaagaluarput, taasumalu saniatigut meeqqanut inuusuttunullu sullissinitsinni aningaasat atorneqarsimasinnaagaluarlutik. Kristine Raahauge oqarpoq nangillunilu: - Akiliisitsiniartarneq sukaternikuuarput, ilaatigut allaat inuit akiitsui matuneqarniassammata pigisaat nalillit arsaarinnissutigisarpagut. Akiliisitsiniartartut sukannernerusumik ukiuni kingullerni ingerlatsilernikuupput, taamaakkaluartorli inuit ilaat meeqqanut akiligassallit, millionit affaata tungaanut akiligassaqartarput, taakkualu akiliisinniartarneri artornartartorujussuupput.
- Siusinnerusukkut KANUKOKA aqqutigalugu qaqittarsimagaluarparput, meeqqanut akilersuutit qitiusumit isumagineqalernissaat, taannali iluatsittarsimanngilarput, Kristine Raahauge oqarpoq.
Nunatsinni innuttaasut ukioqanngitsuninngaanniit agguaqatigiisillugit kommuninut akiitsui 12.200 koruunit missaanniipput.