Akiitsullit qajassuuteqqunngilai

Meeqqanut akilersuutit, kommuninut akiitsorineqartut koruuninik 200 millioninik amerlassuseqarput, KANUKOKA-milu siulittaasoq Karl Lyberth isumaqarpoq, akiitsullit akiitsuinik qajassuunnagit akilersuitinneqartariaqartut.

- Suliffissaaleqineq taanna patsisaasinnaassaaq, kisianni aamma inoqartarpoq akissaqaraluarlutik akileerusunneq ajortunik, taakkulu sakkugisinnaasut tamaasa atorlugit akiliisinniarneqartariaqarput, aamma qajassuarneq atorneqartariaqanngilaq. Allaqarporli akileerusukkaluartunik akiliisinnaanngitsunilli, taakkulu periarfissiuunneqartariaqarput, Karl Lyberth oqarpoq, nangillunilu: - Namminersornerullutik Oqartussat KANUKOKA-lu suleqatigiissitalianik 2002-mi pilersitsinikuupput, taakkulu siunnersuuteqarput, naalakkersuisunut 2003-mi ingerlanneqartumik. Ulloq manna tikillugu suli tusagaqaqqissimanngilagut, maannakkullu KANUKOKA-mi atorfilittat piaartumik qinnuigissavakka, taanna suliaq eqqarsaatigalugu Namminersornerullutik Oqartussat eqqaasitsissummik allaffigeqqullugit.

Taama oqarpoq KANUKOKA-mi siulittaasoq Karl Lyberth.