Akiitsullit 20-t inigisaannit anisippaat

Paamiuni ilaqutariit 15-t 20-llu akornanni sapaatip-akunnerani kingullermi inimminit anisitaapput.

Ineqartut qaammatini arlalinni akiliisimanngitsut A/S INI-mit politiit ikiorsiullugit anisitsisarput, politiillu ataasiarlutik anaattaminnik atuisariaqarsimapput.

Paamiuni politiit, INI-mi sulisut viceværtillu inigisaminnut akiliisimanngitsunut arlaleriarlutillu politiinut saaffiginneqquneqartaraluarlutik saaffiginnissimanngitsunut pingasunngornermi, sisamanngornermi tallimanngornermilu kasuttoqattaarsimasut, Paamiuni politiit pisortaat Hans Peter Olsen oqaluttuarpoq:

- Inuit allaffigiortorpagut ulloq una saaffiginninngikkussi takkutissaagut, sapaatillu akunnerani kingullermi allaffigisagut ornippagut, Hans Peter Olsen oqarpoq nangillunilu:

- Allakkatigut saaffiginnissutigut iluaqutaapput. Inuit arlallit akiitsoqartut kommunemut ikioqqupput ilaallu namminneq akiitsuminnik akilersuilerlutik. Inuilli ilaat pissarsiarinngitsoorpagut. Taakku INI-mit viceværtinillu matuersaaserfii taasersorneqarput, taamaalillutik inigisaminnut isersinnaajunnaarsillugit, Hans Peter Olsen oqarpoq.

Anisitsinermi ataatsimi politiit anaattaminnik atuisariaqarsimapput angullu ataaseq paffequseriarlugu tigusarineqartariaqarsimavoq.

- Politiit marluullutik anisitassatik ornikkamikkik saassunneqarsimapput politiillu sakkortuuliorfigineqarnerminni anaatatik atortariaqarsimavaat saassussisorlu paffequseriarlugu isertitsivimmukaattariaqarsimavaat, Hans Peter Olsen oqaluttuarpoq.

Angut pineqartoq maanna politiinik persuttaasimasutut unnerluutigineqarpoq.

Paamiuni politiit 30-inik suliassaqartut, iniminnut akiitsullit 15-t 20-llu akornanniittut anisippaat. Hans Peter Olsenip erseqqissaatigaa, INI inissaqartitsigaangat aatsaat anisitsisoqartartoq.