Akiitsorpassuanittarneq patsiseqartarpoq
Meeqqanut akilersuutaannarnut nunatsinni katillugu 200 millioni koruuninik akiitsoqartoqarpoq.
Kingusinaartumik paasillugu meeraqalersimalluni, akiitsorpassuanittoqarsinnaavoq, tamannalu Nuummi najugallip 40-nik ukiullip, Morten Møller-ip misigisimavaa. Akiligassarpassuaqalereerluni aatsaat meeraqarnini Morten Møllerip paasivaa, ilaatigut 20.000 koruunit sinnerlugit akiligassanereerluni. Taannalu ima oqaluttuarpoq.
- Akiitsukka ukiut kingumut qiviarlutik aallartippaat, tassami oqarfigineqarpunga, akki ernertaarputit, aamma aaku akiligassatit. Aallaqqaammut uannut nanertuutaaqaat, allaat akiligassarpassuakka tunniutiinnarfigingajappakka. Kisianni eqqarsarlualeriarama akilersuillunga aallartippunga akiitsorpassuakkalu taamaasillunga anigorlugit, naak artornaraluartoq.
Morten Møller aamma isumaqarpoq, akilersuisinnaanermut ileqqoq nunatsinni iluamik sungiusimaneqanngitsoq ilinniarneqartariaqartorlu.
- Ukiut 50-60-it matuma siorna nutarterineq aallartippoq, taamanikkullu inuppasuulluta najugaqatigiittarluta ikioqatigiilluartarlutalu. Maannakkut tamatta immikkut ineqartitilernikuuvugut, nutarterinerlu ingerlanneqarnikuuvoq. Inoqarpoq nutaanngulernermi malinnaasinnaanngitsunik inoqarlunilu malinnaalluarsinnaasunik.
Taamaammat isumaqarpunga akilersuisinnaaneq meeqqat atuarfianni aamma ilinniagassatut ilanngunneqartariaqartoq, aamma nutaaliaasumik ingerlanerput Naalakkersuisut tungaanninngaanniit mianersuunneqarnerulluni ingerlanneqartariaqarpoq, taama oqarpoq, Nuummi najugalik Morten Møller. Taassuma ernera angajulleq, maannakkut 21-nik ukioqarpoq.
