Akiilisitsiniartartut Ilulissani ulappupput

Ilulissani suliffeqarfiit ilaat Akileraartarnermut Aqutsisoqarfimmut akiitsuminnut akilersuilernissaminnut isumaqatigiissusiorsinnaanngikkunik, akiliisinnaajunnaartutut nalunaarutigineqarlutik matuinnartariaqalersinnaapput.

Akileraartarnermut Aqutsisoqarfimmiut Ilulissani suliffeqarfiutilinnut suliassat 42-it 10,1 million koruuninik akiitsoqarfiusut akiliisitsiniutiginiarlugit ulluni makkunani ulapputigileruttorpaat.

Aningaasat, suliffeqarfiutillit suliffiutiminnit inuttulluunniit namminneq pisortanut akiitsorilersimasaat akilersinniarneqarput.

- Tassa akiligassat suulluunniit pineqarput. Eqqaavinnut, paaviartinnernut, meeqqanut akilersuutinut, a-skat, restskat-illu. Assigiinngitsorpassuarnik tassa imaqarput, Ane Kathrine Kleist, Akileraartarnermut Aqutsisoqarfiup avannaani immikkoortortaqarfiani siunnersorti taama oqarpoq.

Akileraartarnermut Aqutsisoqarfiup Ilulissani suliffiutillit akileraarutinut A-nut akiittullit akiliisinniarneri aallaavigaat, kisianni suliffeqarfiit inunnit ataasiakkaanit pigineqarpata, piginnittut pisortanut akiittui suungaluartulluunniit ilanngullugit akiliisitsiniutigivaat.

Suliffiutillit akiittuminnut akilersuinissaminnut isumaqatigiissusiorsinnaanngikkunik suliffeqarfii matuinnarneqartariaqalersinnaapput.

- Akiliisitsiniaaneq naliginnaasumik ingerlavoq. Suleqataanianngippat akiittuminillu akiliisinnaanngippat allatut ajornartumik akiliisinnaajunnaartutut nalilerneqassooq, Ane Kathrine Kleist oqarpoq. Taassuma akiittut 100 koruuniuppata imaluunniit millioniuppata akiliisitsiniutigineqarnerisa suliakkersuutaasarneri assigiinnerarpai.

- Tassa tamarmik, 100 koruuniinnaappat imaluunniit millioniuppat piffissarujussuarmik tigusisarput. Eqqaasitsissummik nassinneqareeraangamik aggersarneqarnerit tusarniaanerillu pereeraangata pinngitsaaliilluta akiliisitsiniaaneq atorsinnaasarparput. Taamaalilluni piffissarujussuaq atorsinnaasarpoq 100 koruuniinnaangaluarpalluunniit, Ane Kathrine Kleist oqarpoq.

Akileraartarnermut Aqutsisoqarfimmit ilanngullugu oqaluttuarineqarpoq Nunatsinni eqqaavinnut ingitsisarnermut akiittorineqartunut suliassat katillugit 70.000-it missaat aalaakkaasumik akiliisitsiniutigineqartussatut inissisimasartut.

Akileraarutinut Aqutsisoqarfik Ilulissani suliffeqarfiutilinnut akiliisitsiniareeruni Aasiannut sisamanngorpat ingerlaqqissaaq. Tassani suliassat 18-it suliarissavaat, taakkunani akiitsorineqartut 5,6 million koruunit akiliisitsiniutigissallugit.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat