Qinersinermit qaammatip aappaata affaata kingorna: Aki-Matilda Høegh-Damip marlunnik qinigaaffeqarnera erseqqissarneqanngitsoq

Politikerip Naleqqameersup, Aki-Matilda Høegh-Damip qinersisartuni Folketingimiiginnassanerluni qaammat ataaseq sinnerlugu erseqqissumik nalunaaruteqarfiginngilaa.

Allattoq Helle Nørrelund Sørensen

apriilip 23-at 2025 14:30

Nutserisoq Connie Fontain

Aki-Matilda Høegh-Dam marsip aqqarnani qinersisoqarmat nuannaarsinnaavoq. Taannami Naleraq sinnerlugu qineqqusaarnermini 2.954-init taaguunneqarluni qinigaavoq.

Taannalu aatsaat siullermeerluni qinigaangaatsianngilaq. Aki-Matilda Høegh-Damimi 2022-mi Siumut sinnerlugu Folketingimut qineqqusaarami qinersinermi 6.670-init taaguunneqarpoq.

Inatsisartunullu qinersinermit maanna sapaatit akunneri arfinillit qaangiutereeraluartut Aki-Matilda Høegh-Dam Folketingimi Inatsisartunilu suliinnassanersoq erseqqissarneqanngilaq.

Aki-Matilda Høegh-Damip Folketingimut tulliani qinersisoqarnissaanut qinigassanngorteqqinniarani ukiut marluk matuma siorna nalunaarutigaa. Taassuma tamanna Siumumi 2023-mi juulimi siulittaasunngorniunnermi ajorsarnermi kingorna oqaatigaa.

Naleqqamilu ilaasortaq Inatsisartunut qinigaassagaluaruni Folketingimit tunuarnissani naatsorsuutigalugu danskit tusagassiorfiannut, Radio IIII-mut marsip aqqarnani oqaatigaa.

KNR-ip tamanna pillugu arlaleriarluni apersorniaraluarpaa. Inatsisartuni Folketingimilu ukiakkut ataatsimiinnerit piffissami assigiinngimmi ingerlanneqartarnerat pissutigalugu qinigaaffini marluk qanoq ililluni nakkutigisinnaassanerai ilaatigut tusarusukkaluarparput.

Aamma atuarukAki-Matilda Høegh-Dam politikkeritut marloqiusamik akissarsisalertussanngortoq

Aki-Matilda Høegh-Dam Inatsisartunut qinersinermit sapaatip akunnera qaangiuttoq KNR-imut oqarpoq:

- Sulinngiffeqarnissara naatsorsuutigaara, sinniisussallu atuutissapput.

Qaqugumit sulinngiffeqalernini atuutilissanersoq taassuma taamani iluamik akinngilaa. Kisianni tamanna oktobarimi folketingip ukiuata nutaap aallartinnerani siusinnerpaamik pissaaq.

Folketingimit sulinngiffeqarnissamut - malittarisassat

Folketingimi politikerit aalajangersakkat uku ilaat eqquutsissinnaagunikku akissarsiaqarlutik sulinngiffeqarsinnaapput:

Naartuneq, ernineq imaluunniit meeravissiartaarneq
Napparsimaneq, meeqqamik napparsimaruluttumik imaluunniit qanigisamik nammineq angerlarsimaffini toqujartortumik paarsineq
Nunanut allanut imaluunniit Savalimmiunit Kalaallit Nunaannulluunniit pisortanit suliaqariartorneq
Savalimmiuni Lagtingimi imaluunniit Kalaallit Nunaanni Inatsisartuni ataatsimiinnerit.
Ministerit nunanut allanut imaluunniit Savalimmiunut Kalaallit Nunaanulluunniit suliaqariartorlutik angalanerat

Folketingimi ilaasortat sulinngiffeqarnermi nalaani qaammut 71.000 koruunit missaannik akissarsiaqartarput.

Paasissutissarsiffik: Folketingimi sulineq pillugu atuagaq najoqqutassaq / Folketinget.dk

Allisiguk

- Pisumi nalilersuileruttorpugut, kisianni sinniisussat oqaloqatigaagut, taakkulu piareersimatillugit suliartortissinnaassallugit neriuutigaara.

Naleqqap Folketingimi tusagassiinermut suliaqartuata 'suliamut atatillugu nutaanik paasissutissaqanngitsoq', KNR-imut paasissutissiissutigaa. Paasisaqarluareerunili KNR-imit apersorneqarusussinnaasoq nalunaarutigineqarpoq.

Folketingimut ilaasortat sulinngiffeqarnermi nalaani qaammammut 71.000 koruunit missaannik akissarsiaqartarput. Inatsisartunut ilaasortat qaammammut 50.000 koruunit missaannik ajunngitsorsiassaqartarput.

Kimit taarserneqassanersoq ilisimaneqanngitsoq

Folketingip Siulittaasoqarfiata Qullersaqarfiatalu 'Aki-Matilda Høegh-Damip Folketingimi ilaasortaanerani allanngortoqanngitsoq', KNR-imut mailikkut paasissutissiissutigaa.

Aki-Matildap Danmarkimi kalaallit meerartaannik inissiisarnermut inatsit allanngortinneqartup Folketingimi aappassaaneerneqarnera sapaatip akunnerani matumani aamma peqataaffigaa.

Aki-Matilda Høegh-Dam Folketingimit sulinngiffeqarnissani qinnutigissappagu taassuma qinigaaffia sinniisussamut siullermut Markus E. Olsenimut ingerlateqqinneqassaaq. Taanna Aki-Matilda Høegh-Damip USa-mi pikkorissarnerata nalaani Folketingip 2023-mi oktobarimi ammaanersiornerani sinniisussatut peqataavoq.

Aamma atuarukAki-Matilda Høegh-Dam Naleqqami ilaasortanngortoq

KNR-ip taanna arlaleriarluni attaviginiaraluarpaa iluatsinngitsumilli.

Folketingimi sinniisussat aappaa tassaavoq Karina Zeeb sinniisussallu pinguat tassaalluni Elvira Kûitse.

Folketingip ukiua juunip sisamaani naammassissaaq oktobarillu arfineq-aappaani aallarteqqissalluni. Inatsisartunut ukiakkut ataatsimiinneq septembarip 19-ianni aallartissaaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.