Oqaatsit taakku ukiup kingulliup ingerlanerani arlaleriarluta tusartareerpavut. USA-llu præsidentiata oqaatsit taakku ataasinngornermut unnuaani oqaatigeqqippai:

- Nunatta isumannaatsuunissaa pillugu Kalaallit Nunaat pisariaqartipparput, Donald Trump, Kalaallit Nunaannut tunngatillugu arlaatigut iliuuseqarniarnersoq tusagassiortumit aperineqarami akivoq:

USA p Venezuelamik saassussereernerata aqaguani taama oqarpoq.

Naalakkersuisut siulittaasuata Jens-Frederik Nielsenip(D) præsidentip oqaasii sakkortuumik illuatungileqqippai:

- USA præsidentiata maanna oqaaseqaqqinnermini, Venezuelap sakkulersorfigineqarnerani taputartuulluta eqqaallatsiarpaatigut “Kalaallit Nunaat atorfissaqartipparput”, oqaatsitigut kusananngilluinnarpoq ataqqinninnginnerujussuullunilu, Jens-Frederik Nielsen, inoqatinut attaveqaqatigiittarfikkut ilaatigut allappoq.

Maannangaarli iliuuseqartoqartariaqalernera, Folketingimut ilaasortap Aki-Matilda Høegh-Damip, Naleqqameersup, ujartorpaa.

Nunatsinni partiit nunatta siunissaq pillugu suut piumasarinerai isumaqatigiissutigisariaqaraat taanna isumaqarpoq:

- Suna kissaatiginnginneripput avammut tusartissallugu pikkoriffigaarput. Taamatulli uteqattaarineq angusaqarfiunngitsutut isikkoqarpoq. Oqarutta nunatta siunissaa uagut nammineq aalajangigassarigipput, taava suna anguniagarineripput ersarinnerusariaqarpoq, Aki-Matilda Høegh-Dam oqarpoq.

Partiit tamaviisa akimorlugit katersuuttoqartariaqartoq

USA-p Kalaallit Nunaannik pisariaqartitsineranik Trumpip oqaaseqaqqinnera politikerip Naleqqameersup, inatsisartuni aamma ilaasortaasup, tupigusuutiginngilaa:

- Politikerit eqqissisimasumik taamaammat oqaloqatigiittariaqarput, eqqarsarluarlutillu nunatta siunissaa pillugu allorfissat suunersut paasisariaqarlugit.

- Kalaallit Nunaata kalaallit pigigaat attattariaqarparput, soqutigisagulli suunersut oqaloqatigiinnikkut aamma ersarinnerusariaqarput, soqutigisatta tusarneqarnissaat taamaasilluta qulakkeersinnaaniassagatsigit, taanna oqarpoq.

Aki-Matilda Høegh-Damimi naapertorlugu nunatsinni partiit nunatta nunanut allanut tunngasuni politikkianut tunngasuni isumaqatigiippallaanngillat, nunattalu suna anguniagarineraa ersarippallaarani.

- Partiit siuttuisa naalakkersuisullu tamanna isumaqatigiissutigisariaqarpaat.

- Isumaqatigiinnginnerup pissutaanik politikkerit avissaartuutissapata, inuiaqatigiinnut kinguneqassaaq. Ataatsimoorluta nunarsuarmioqatitsinnut, partiit tamaviisa akimorlugit, tapersersoqatigiinnissarput pingaaruteqarmat maannakkut taanna oqallinneq pisariaqarpoq. Qanoq qisuariassaagut, ataatsimuunngikkutta ajorsassaagut. Partiit akimorlugit naapeqatigiissinnaasariaqarpugut, taanna oqarpoq.

Kultureqarfigineqanngilaq

Partiit siuttui KNR-imi ataasinngormat oqallitsinneqarput, pisut tassani oqallisigineqarlutik. Naalakkersuisut siulittaasuat Jens-Frederik Nielsen(D) pisut kingulliit pillugit tusagassiortunut sassarnermi taassuma saniatigut oqaaseqarpoq.

Aki-Matilda Høegh-Dam, naak partiit siuttui oqallitsinneqaraluartut tusagassiortunullu sassartoqaraluartoq taava isumaqarpit nunarput pisumut qanoq isumaqarnersoq ersarissumik saqqummiunneqanngitsoq?

- Naagga, kisianni aamma paasisinnaalluarpara. Nunarput nunanut allanut politikkikkut oqartussaaffeqarsimanngisaannarpoq. Taamaammat tupiginngilara pisarnermit sulissutiginerusariaqaripput, sungiusimannginnatsigumi.

- Politikerit nunatsinniittut taamaammat katersuuttariaqarput qanoq iliuuseqarnissamut alloriarnerit tullii suussanersut matoqqasumik oqaloqatigiissutiginiassamassuk, atorfilittatigut toqqaannartumik attaveqalersinnaaniassagatta, Aki-Matilda Høegh-Dam oqarpoq.