Kalaallit Nunaanni Eqqartuussiviup eqqartuussiviillu eqqartuussisuisa pisortaat tusagassiutinullu oqaaseqartartuat Stig Nørskov-Jensen Siumumit Folketingimi ilaasortap isornartorsiuineranut akerliliivoq.Assi: KNR

Aki-Matilda Høegh-Damip isornartorsiuereernerani: Eqqartuussisut pikkoripput

Eqqartuussisut Aki-Matilda Høegh-Damip (S) eqqartuussissoqarfinni eqqartuussutit inatsisitigut kukkusumik tunngaveqartumik aalajangiiffigineqartarneraaneranut akerliliipput.

Nunatsinni eqqartuussivinni eqqartuussisut "pikkoripput - pikkoreqaat."

Kalaallit Nunaanni Eqqartuussiviup eqqartuussiviillu eqqartuussisuisa pisortaat tusagassiutinullu oqaaseqartartuat, Stig Nørskov-Jensen, taama akissuteqarpoq.

Nunatsinni, ingammik eqqartuussivinni, inatsisitigut isumannaassuunerulersitsinissaq sulissutigissagini, Siumumit Folketingimi ilaasortaq Aki-Matilda Høegh-Dam KNR-imit sapaatit akunerata siuliani apersorneqarluni oqarpoq. Eqqartuussutimmi inatsisitigut kukkusumik tunngaveqartumik aalajangiiffigineqartartut amerlavallaartut, taanna isumaqarpoq.

- Takusinnaavarput eqqartuussutit amerlasuut inatsisitigut kukkusumik tunngaveqartumik ajoraluartumik aalajangiiffigineqartartut, immaqa inatsit kukkusumik atuarneqarsimalluni, taanna KNR-imut oqarpoq.

Eqqartuussisut "inatsisinik atuarnissamut paasinninnissaminnullu pisinnaatitaaffigisaminnik pitsanngorsaavigineqartariaqartut", taanna isumaqarpoq.

Isornartorsiuinerali tunngavissaqanngitsoq, Stig Nørskov-Jensen KNR-imut oqarpoq:

- Aki-Matilda Høegh-Damip isornartorsiuinerminut tunngavilersuutai ilisarisinnaanngilakka.

Ilinniagaat assigiinngitsuusut 

Nunatsinni eqqartuussisunngornissap Danmarkimi Savalimmiunilu illoqarfiit eqqartuussiviini eqqartuussisunngornissamit piumasaqaatitakinnerunera, eqqartuussisut inatsisitigut kukkusumik tunngaveqartumik aalajangiisarnerannut peqqutaasoq, Siumumit Folketingimi ilaasortaq oqarpoq.

Nunatsinni eqqartuussivinni eqqartuussisunngorniarneq aamma Danmarkimi Savalimmiunilu illoqarfinni eqqartuussivinni eqqartuussisunngorniarneq

 

Nunatsinni eqqartuussiviit aamma Danmarkimi Savalimmiunilu illoqarfinni eqqartuussiviit siullertut suliarinniffiusarput.
 

Pineqaatissinneqarsimannginnermik uppernarsaateqaruit kommunalbestyresimullu qinigassanngortissinnaaguit nunatsinni  eqqartuussisunngorniarnissamut qinnuteqarsinnaavutit. Ilinniarneq ukiunik marlunnik qaammatinillu pingasunik sivisussuseqarpoq. Nunatsinni eqqartuussisunngorniat tassani atorfeqarlutillu pikkorissarnermik saniatigut sulianik ingerlatsisarput.


Inatsisilerinermik Ilisimatusarfimmi ilinniagaqarsimaguit eqqartuussisunngorniarnerit sivikinnerusinnaavoq.
 

Danmarkimi Savalimmiunilu illoqarfiit eqqartuussiviini eqqartuussisut inatsisilerituutut Aarhusimi, Københavnimi, Odensemi Aalborgimiluunniit ilisimatusarfimmi minnerpaatut ilinniarsimasuunissaat piumasaqaataavoq.

Inatsisilerituutut ilinniareernerminni killilimmik piffissalikkamik qaammatini qulingiluani atorfinitsitaagallareernerminni eqqartuussisunngorsinnaasutut nalunaarutigineqartarput.

 

Tusarfik: Kalaallit Nunaanni Eqqartuussivik, Uddannelsesguiden.dk, Domstolstyrelsen

Nunatsinnili Danmarkimilu eqqartuussiviit aaqqissuussaanerat assigiinngillat. Tamannalu politikkikkut aalajangigaammat, Stig Nørskov-Jensenip oqaaseqarfigerusunngilaa.

Innuttaasulli nunatsinni eqqartuussivinni inatsisitigut isumannaassusaat Danmarkimi Savalimmiuniluunniit innuttaasut illoqarfiit eqqartuussiviini inatsisitigut isumannaassusaannit ajornerunngitsoq, taanna isumaqarpoq.

- Isornartorsiuinerminut tunngavilersuutai oqaatigeriikkattut ilisarisinnaanngilakka. Eqqartuussisuvut ilinniarluarsimasuullutillu pikkoripput - pikkoreqaat, Stig Nørskov-Jensen oqarpoq.

Suliat marluk nalunaarusiarlu isornartorsiuinerminut tunngavigai 

Eqqartuussutit sorliit inatsisitigut kukkusumik tunngaveqartumik aalajangiiffigineqarsimanersut nassuiarsinnaaneraa, KNR-ip Aki-Matilda Høegh-Dam aperaa.

Taassuma 2019-imi suliat assigiinngitsut marluk KNR-imut mailikkut innersuussutigai. Suliat taakku tamarmik ukiukitsunut kinguaassiuutitigut pinerluuteqarsimanermut tunngassuteqarlutillu eqqartuussivimmi nunattalu eqqartuussisuuneqarfiani suliaapput.

Suliani taakkunani eqqartuussat eqqartuussivimmit nunattalu eqqartuussisuuneqarfianit pineqaatissinneqarput. pineqaatissiissutaalli assigiinnatik.

Suliat taakku marluk Sermitsiaq.AG-ip allaaserai, takuuk una unalu.

Danskit eqqartuussissuserisuisa siunnersuisoqatigiivisa 2016-imi nalunaarusiaat, Siumumit Folketingimi ilaasortap aamma innersuussutigaa. Nunatsinni Eqqartuussivinni sulianik ingerlatseriaaseq naammaginanngitsoq, tassani ilaatigut allaqqavoq. 

Nunatsinnili eqqartuussisut suliamikkut ukiuni kingullerni ineriartupiloortut, Stig Nørskov-Jensen erseqqissaavoq.

Tamanna nunatta illersuisuunerata, Finn Meinelip, uppernarsarpaa. Taanna inatsisilerituujuvoq, namminersortuulluni eqqartuussissuserisoqarfiuteqarpoq illersuisunngornianillu ilinniartitseqataasarluni. Taannalu eqqartuussisut piginnaasaannik apeqqusigassaqanngilaq.

- Eqqartuussiviit arlalinnik ukiuni kingullerni eqqartuussisortaarput, taakkualu pikkoreqaat. Ilinniagaat aaqqissuulluagaammat eqqartuussisutut suliaminnut piginnaanngorsarluagaapput, taanna KNR-imut oqarpoq. 

Aki-Matildap oqaatigisani erseqqissarai

Aki-Matilda Høegh-Damip sapaatit akunnerata siuliani oqaatigisani KNR-imut mailikkut erseqqissarpai. Eqqartuussutit Nunatta Eqqartuussisuuneqarfiani sukannernerulersinneqarsimasut amerlassusaat apeqqutaajunnaartippai.

- Eqqartuussivimmi eqqartuussutit Nunatta Eqqartuussisuuneqarfiani sukannernerulersinneqarsimasut qanoq amerlatiginersut apeqqutaanngilaq. Isumaqarpungami suliaq ataasiinnarluunniit inatsisitigut kukkusumik tunngaveqartumik aalajangiiffigineqarsimasariaqanngikkaluartoq.

- Inatsisitigut isumannaassuseq minnerunngitsumillu eqqugaasut illersorniarlugit, suliat sapinngisamik naammassilertorneqartarnissaat anguniarlugu eqqartuussiviit aallaqqaataaniilli eqqortumik eqqartuussuteqartarnissaannut sapinngisamik pitsaanerpaanik najoqqutassaqartinneqarnissaat periarfissaqartitaanissaallu tassani pivara.

Stig Nørskov-Jensenip Aki-Matilda Høegh-Dam Folketingimilu ilaasortaaqataa, IA-mit Aaja Chemnitz Larsen, Kalaallit Nunaanni Eqqartuussivimmi, Aki-Matilda Høegh-Damip isornartorsiuteqareernerani, ataatsimeeqatiserai.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat