- Imaassinnaavoq Trump amerikamiut præsidentiinit siulliulluni Nunatsinni kalaallit politikeriinik ataatsimeeqateqaqqaartoq. Aningaasaliinerit pillugit oqalliseqatigiartorlugu nunatsinnukarnissamut tikilluaqqusaavoq, Simumit folketingimut ilaasortaq, Aki-Matilda Høegh-Dam KNR-imut oqarpoq.Assi: Paalu Møller

Aki-Matilda Høegh-Dam: Præsident Trump nunatsinnut tikilluaqqusaavoq

Naak amerikamiut præsidentiata nunatsinnut tunngatillugu oqaatigisai Danmarkimullu tikeraarnissaminik taamaatitsiinnarnera pillugit perulluliortoqaraluartoq nunatsinnut tikeraarluni aningaasaliinissanik oqallisiginninnissamut tikilluaqqusaavoq, Siumumit folketingimut ilaasortaq, Aki-Matilda Høegh-Dam oqarpoq.

Sunaluuniit ima ajortiginngilaq arlaannut ajortuulluni, Siumumit folketingimut ilaasortaq, Aki-Matilda Høegh-Dam oqarpoq.

Soorlu amerikamiut præsidentiat nunatsinnik pisinissamik soqutiginnittoq Danmarkimut tikeraarnissamik taamaatitsiinnaraluarnera.

- Uggornarpoq, pisinialikkersaarnermut oqallisigineqarsinnaasut allat amerlasoorujussuugaluarput. Kalaallit Nunaannut tunngatillugu Illuatungaatigullu Kalaallit Nunaat pillugu arlaatigut kalerriutaavoq, taamaammat ajuinnartuunngilaq, Aki-Matilda Høegh-Dam KNR-imut oqarpoq.

AAMMA ATUARUK Trumpip Nunatta tunineqarnissaata itigartitsissutigineqareerneratigut tikeraarnissani kinguartikkaa

Præsident Trumpip Danmarkimut septembarip aappaanit pingajuannut tikeraarnissaraluaminik taamaatitsiinnarnera kusanaagaa, nunatsinnullu atatillugu soqutiginninnera nunatsinnut iluaqutissartaqartoq folketingimi ilaasortaq oqarpoq.

- Taamaatitsiinnarnera arlaannut atorsinnaaneranut tunngavallaanngilaq. Kisianni Trumpilli oqallisaangaatsialersippaatigut tusagassiuutitigullu sammineqartilluta. Taamaammat Nunarput qanoq ittuunersoq qanorlu ilusilersugaanerput ukkatarineqarnerungaatsialerpoq. Tamannami pillugu naalagaaffeqatigiit tunuliaqutaralugit nunanut allanut politikkimik ingerlatsinissarput ajornannginnerulissaaq.

Trump Nunatsinni aningaasaliisussatut tikilluaqqusaasoq

Præsidentip Trumpip oqaaserisai Danmarkimullu tikeraarnissaminik taamaatitsinera nunatta USA-llu akornanni atassutinut ajornerulersitsinavianngitsoq Siumumit politikeri isumaqarpoq.

Illuatungaanili Aki-Matilda Høegh-Damip præsidenti nunatsinnut tikeraartikkusuppaa.

- Akornutaanavianngitsoq isumaqarpunga. Imaassinnaavoq Trump amerikamiut præsidentiinit siulliulluni nunatsinni kalaallit politikeriinik ataatsimeeqateqaqqaartoq. Aningaasaliinerit pillugit oqalliseqatigiartorlugu nunatsinnukarnissamut tikilluaqqusaavoq.

AAMMA ATUARUK Trumpip Kalaallit Nunaat aningaasarpassuarnik tapiissutinillu akilerniaraluarpaa

Naalakkersuisut siulittaasuata, Kim Kielsenip (S) nunarput tuniniagaannginnerarpaa, Namminersorlutik Oqartussalli USA-mut niueqatigiinnissamut ammanerarlugit.

Inuit Ataqatigiinnit folketingimut ilaasortap, Aaja Chemnitz Larsenip Nunarput pillugu ukkatarinnittoqarnera danskit politikeriinut nunatsinnut naalagaaffiullu nunatsinni suliassaanut soqutiginninnerulersitsisariaqarsoraa.

Aki-Matilda Høegh-Damilli danskit naalakkersuisui ukiuni kingullerni nikerartut Nunatsinnut attaveqaatimik pitsannguuteqarsorai. Amerikamiullu præsidentiata pissusilersuutaa tamatumunnga aamma iluaqutaanerusoraa.

- Trumpip pissusilersuutaa Danmarkip Nunatsinnut naligiinnerusumik tunngaveqarneranik siullermit asseqanngitsumik qaninnerulersitsisoraara.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat