- Naalagaaffiunnginnatta naalagaaffiit naapinnerini peqataannginnerput eqqumiitsuunngilaq, Aki-Matilda Høegh-Dam oqarpoq.Assi: Scanpix

Aki-Matilda Høegh-Dam: Naalagaaffiunnginnatta NATO-mi ataatsimeeqataannginnerput paasinarpoq

Ministeriunerup nunarput pillugu Trumpimik ataatsimeeqateqarsimaneranut Aaja Chemnitz Larsenip isornartorsiuinera Siumumeersup Aki-Matilda Høegh-Damip isumaqatiginngilaa.

NATO-p Londonimi ataatsimeersuarnerani ministeriuneq Mette Frederiksen aamma Donald Trump Issittoq pillugu suleqatigiinnerulernissaq oqaloqatigiissutigalugu naapipput.

Kisianni Kalaallit Nunaat imaluunniit Savalimmiut ataatsimiinnermut peqataatinneqanngillat. Tamannalu IA-meersup Aaja Chemnitz Larsenip sakkortuumik isornartorsuineranik kinguneqarpoq:

- Nunarput naalagaaffeqatigiinneq aqqutigalugu NATO-mi ilaavoq, taamaammat nunatsinnut tunngasutigut oqaasissaqaqataasariaqarpugut. Tamannalumi Itillermi Isumaqatigiissummi 2003-meersumi allassimavoq, Aaja Chemnitz Larsen KNR-imut pingasunngornermi taama oqarpoq.

Kisianni nunatsinnit folketingimut ilaasortaatitaasup aappaata, Aki-Matilda Høegh-Damip (S), isumaqatiginngilaa.

- Uanga isumaqarpunga paasinartorujussuusoq. Pissutigalugu naalagaaffiunnginnatta naalagaaffiit naapinnerini peqataannginnerput eqqumiitsuunngilaq, Aki-Matilda Høegh-Dam oqarpoq.

Itillermi Isumaqatigiissut

Danmarkimi ministeriunerusimasup, Per Stig Møllerip naalakkersuisullu siulittaasorisimasaata, Hans Enoksenip, Itillermi isumaqatigiissut 2003-mi atsiorpaat. Nunatta nunanut allanut sillimaniarnermullu tunngasutigut peqataatinneqarnissaa qulakkeerumallugu isumaqatigiissut taanna pilersippaat. Tamatuma kingorna Per Stig Møller nunatta nersornaasiuttagaani akimanersaannik tassa Nersornaammik guldiusumik nersornaasigaavoq, ingammik Itillermi isumaqatigiissummik pilersitsinini pillugu.

Itillermi isumaqatigiissut ima allassimasoqarpoq:

  • Nunanut allanut sillimaniarnermullu tunngasutigut Kalaallit Nunaannut attuumassutilinnik oqallinnerni Kalaallit Nunaata peqataatinneqartarnissaa sunniuteqaqataasarnissaalu pissusissamisoorpoq.

Paasissutissanik pissarsiffik: Naalakkersuisut

AAMMA ATUARUK Aleqa Hammond puffassimaaqataasoq: Sooruna Trumpimik ataatsimeeqateqarnermi peqataanngitsugut?

- Takutiinnarpaa qanoq pisariaqartigisoq naalagaaffinngornissaq. Imaannginnami uagut nunap allap ataaniikkatta tamakkununnga oqartussaanerput annertunerulersinnaasoq, naak suleqatiginninniarneq pitsaanerulernikuungaluartoq, Aki-Matilda Høegh-Dam oqarpoq.

Taamaalilluni Aleqa Hammondip Nunanut allanut sillimaniarnermullu ataatsimiitsitaliami siulittaasup, kisimi qallunaat naalakkersuisui NATO-p ataatsimiinnerannut qaaqqusaanerata isornartorsiornera Aki-Matilda Høegh Damnip isumaqatigiinngilaa.

Mette Frederiksenip Danmarkimi illersornissaqarfiup nunatsinni silaannakkut angallannermi nakkutilliinerulernissaanut, nunallu allat aqqartartuinik nakkutiginninnermut, 1,5 milliardit koruuninik aningaasaliinissaanut pilersaarutai NATO-p ataatsimeersuarnerani saqqummiuppai. Danskillu ministeriunerata oqarnera naapertorlugu pilersaarutit amerikamiunit akuersaarluarneqarput.

KNR-ip nunanut allanut naalakkersuisoq, Ane Lone Bagger (S) aamma Kim Kielsen ulluni maanna marlunngortuni oqaaseqartinniarsimagaluarpai - iluatsinngitsumilli. Tusarusukkaluarparpummi Mette Frederiksenip nunatta kissaatai pillugit NATO-p ataatsimeersuannginnerani oqaloqatigisimaneraa.

AAMMA ATUARUK Ministeriuneq Trumpip ataatsimeeqatiginera pillugu: Kalaallit Nunaat immikkut ittumik oqaluuserinngilarput

Ane-Lone Baggerilu tallimangnornermi mailerluni ima akissuteqarpoq:

- Ilisimatinneqarpugut Natomi ataatsimeersuartoqalersoq, kisianni Kalaallit Nunaat immikkut eqqartorneqarnavianngitsoq. Tamatumalu saniatigut naalagaaffimmi oqartussat innersuussutigiinnarsinnaavakka.

Aki-Mathilda Høegh-Damilu Mette Frederiksenip aallannginnermini ataatsimeeqatigisimanera innersuussutigalugu ima tapersiuteqarpoq:

- Taavalu arlaatigut Issittoq eqqartorneqalissappat oqarpoq - tassani gruppertitsilluta - nunarput tamaviaartumik peqataatinniarsarissallugu.

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat