Folketingimi ilaasortaq, Aki-Matilda Høegh-Dam Siumumeersoq, Socialdemokraatit gruppiata ataatsimiinnerani peqataasoq.Assi: Screendump fra videoen

Aki-Matilda Høegh-Dam: Danskit naalakkersuisuilu aatsaat taama attavigiilluartigaavut

Folketingimi ilaasortap Siumumeersup, danskit ministeriunerata naalakkersuisuisalu ukiumi ataatsimi angusaat nalerusuutigilluarpai. Taanna Aaja Chemnitz Larsenip isornartorsiuneranut isumaqataanngilaq.

Siumup Mette Frederiksenip Socialdemokraatineersup ministeriuninngornissaanut Folketingimut 2019-imi qinersinissaq sioqqullugu tamakkiisumik taperserpaa. Taamaaliornera imminut akilerpoq.

Siumup Danmarkimi partii suleqatigisaa naalakkersuisoqataavoq, Folketingimilu ilaasortaq, Aki-Matilda Høegh-Dam Siumumeersoq, Socialdemokraatit Folketingimi gruppiata ataatsimiinnerani aamma peqataasarpoq.

Aki-Matilda Høegh-Damip Socialdemokraatillu suleqatigiilluaraluarlutik danskit naalakkersuisuinik isornartorsiunissaminut pissutissaqaruni taamaaliornissani merserinngikkini, inuttaata erseqqissaatigaa.

Taassumali danskit ministeriunerannik naalakkersuisuinillu qinersinermiit ukiumi ataatsimi attavigiinnertik nalerusuutigaa.

Isumaqarpunga ukiumi siullermi attaveqatigiilluaqisugut. Danskit ministeriunerat naalakkersuisuilu suleqatigilluaqaavut. Tamannalu piffissap sivikitsup ingerlanerinnaani angusaqaalunnitsinnut pissutaaqataavoq, Aki-Matilda Høegh-Dam oqarpoq.

Ilaatigut nunatsinni pinerluuteqarsimasunut inissiisarfinni nakkutilliisut politiillu akissarsiaannik qaffaaneq, nunatta meerartaanut inuusuttortaanullu ikiortarialinnut aningaasaliineq Illersornissaqarfiullu Issittumi nakkutilliinerulernera tamatumunnga atatillugu erseqqissaatigai.

Ataqqinnittumik suleqatigiilluarneq

Taamaammat Aki-Matilda Høegh-Damip danskit naalakkersuisuinik attavigiinneq pillugu isumaa, Folketingimi suleqataata Aaja Chemnitz Larsenip Inuit Ataqatigiinneersup isumaanit allaaneroqaaq.

Inuit Ataqatigiinneersummi Aaja Chemnitz Larsenip danskit naalakkersuisui ingammillu ministeriuneq Mette Frederiksen attaveqaqateqarluannginnerarlugit, KNR-imit apersorneqarnermini isornartorsiorpai. Taassumami danskit naalakkersuisuisa nunatsinni akisuussaaffitik pillugit suliniuteqanngippallaarnerarlugillu naalagaaffeqatigiinnermi suliassatik pillugit erseqqissumik periusissiorsimannginnerarpai.

AAMMA ATUARUK Ministeriunerup ataatsimeeqatiginerani nunanut allanut politikki sammineqartoq

Aki-Matilda Høegh-Damili tamatumunnga isumaqataanngeqaaq. Taannami isumaqarpoq, danskit naalakkersuisuisa nunatsinni akisussaaffitik pillugit namminneq suliniuteqangaannginnerat ataqqinninnerusoq.

- Tamannarpiarmi namminersornerulerusunnitsinnut kingornalu namminersorusulernitsinnut pissutaaqataavoq: Tassa danskit naalakkersuisuisa nunatsinni inuiaqatgiiusut qulatiinnarluta aalajangiisarunnaarnissaat piumasaraarput, Aki-Matilda Høegh-Dam oqarpoq.

Taannami isumaqarpoq, taakku siunnersuummik saqqummiivigigaangamigit ajunngisaartaqisut.

- Nunatsinnimi inuiaqatigiinnit qinikkatut pisariaqaraangat oqartarnissatsinnut taakkutulli akisussaaqataatigaavut. Isumaqarpungalu danskit naalakkersuisuisa nunatsinni akisussaaffii pillugit pisariaqartillugu oqaraareerangatta suliniuteqarlertartut, Aki-Matilda Høegh-Dam oqarpoq. 

Suliassaat suli amerlasut

Danskit ministeriunerata naalakkersuisuisalu naammassisassaminnik suli suliassarpassuaqartut, Aki-Matilda Høegh-Dam erseqqissaavoq.

Suliassaat ingammik nunatsinni eqqartuussiveqarnermut inatsiseqarnermullu tunngapput, tamatumanilu eqqartuussiviit piukkunnassuseqarluarnerusunik sulisoqarnissaat pinerluuteqarsimasunullu inissiisarfinniittunut pitsaanerusunik neqerooruteqarnissaq pivai.

AAMMA ATUARUK Overblik: Hvem fik færrest stemmer, og hvem fik flest?

- Eqqartuussiveqarneq siornatigut sipaarniarfigineqangaatsiarpoq. Nunatsinni eqqartuussivinni sulisut Danmarkimi eqqartuussivinni sulisutulli piukkunnaateqartiginngillat. Tamanna suliat naammassisat pitsaassussaannik equtitsisarpoq, Aki-Matilda Høegh-Dam oqarpoq. 

Aki-Matilda Høegh-Dam Siumoqatiminik oqaloqateqartarnini tunngavigalugit isumaqarpoq, Naalakkersuisut danskillu ministeriunerat naalakkersuisuilu oqaluttuarisaanermi aatsaat taama attavigiilluartigisut.

- Isumaqarpunga danskit naalakkersuisuilu nunanut allanut tunngasutigut politikkikkut ingerlatsinermi aatsaat taama suleqatigiilluartigisugut, Aki-Matilda Høegh-Dam KNR-imut oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat