Akerliusut politiillu aporaapput
Nunarsuarmi nunat pisuujunersaat arfineq-pingasut ataatsimiinnissaat G-8-mik taasaq aallartingajalersorlu, Tysklandimi inuit akerliussutsimik takutitsisaqattaarneranni, maannamut inuit 1000-it ikilerneqarnerinik kinguneqareersimavoq.
Tysklandimi politiit naatsorsuutigaat suli ajornerusumik pisoqassasoq, taamaammallu tysklandip oqaluttuarisaanerani aatsaat taamak politiit piareersarnialerput, G-8-milu ataatsimiinnissaq aallartilerpat politiit piareersimasut 16.000-iussapput.
Arfininngormat akerliussutsimik takutitsisut politiillu aporaammata, politiit 433-it ajoqusersimapput, politiillu arlaqartut inuunerat navianartorsiortinneqarsimapput, ilaatigut politiit 30-it sakkortuuliorfigitinnermikkut, niaqqukkut ajoquserujussuartut arlaqarsimallutik.
Arfininngormat akerliusut akornanni sakkortuuliortut tigusarineqartut 128-iusut akornanni qulingiluat tigummigallagassanngortinneqarsimapput.
Politiit sakkortuumik nakkutiginninnissaq maanna pilersaarutigaat, aamma Tysklandimi forbundskanskleri Angela Merkel piumasaqarpoq, akerliussutsimik takutitsisut peqqarniinniarsarisut, saamasaarfigineqassanngitsut.
