Akerliussutsimik takutitsisut inatsisissaq akuerineqareermat: Pakatseqqallutalu kamaqqavugut

Innuttaasorpassuit ilaatigut tupanut sukkunullu akitsuutit qaffaavigineqarnissaannut akerliugaluartut aningaasanut inatsisissaq akuerineqarpoq.

- Pakatsillutalu kamappugut. 

Paninnguaq Falck-Petersen aamma Pipaluk Lynge Rasmussen taama oqarput.

Marluullutik Nuummiorpassuit peqataaffigisaannik "Naammaleqaaq"-mik taallugu pingasunngormat akerliussutsimik takutitsinermik aaqqissuisuupput. Akerliussutsimik takutitsisut Inatsisartut pitsiaannarlutik oqaluuserereeraallu sukkunut, mamakujuttunut, imigassamut tupanullu akitsuutit qaffaavigineqarnissaat ataasinngormat aalajangiinerat aalassaatigaat.

  • Akitsuutit qaffanneqarmata cigaretsit 20-t akii 82 koruuniniit 86,5 koruuninut akitsorput. 
  • Sioraasat poortat ataatsit taamatorluinnangajak aamma akitsorput: 21,95 koruuniniit 26,50 koruuninut.
  • Immiaaraq Carlsbergi ataaseq 18,50 koruuniniit 19,25 koruuninut akitsorpoq.
  • Mamakujuttut aamma akitsorput: 
  • Puussiaq Haribo ataaseq 375 grammi 65 koruuniniit 67 koruuninut akitsorpoq.
  • Sukkulaatit 0,50 koruunit missaannik akitsorput.
    Paasissutissanik pissarsiffik: Brugseni

Akerliussutsimik takutitsisut qasserpiaasimanersut ilisimaneqanngilaq, KNR-illi najuukkiartortitaata inuit ikinnerpaamik  1000-t peqataasimassangatippaat. 

Inuppassuilli taaraluartoq issikkaluartorlu akerliussutsimik takutitsigaluartut Inatsisartut aningaasanut inatsisissaq ippassaq sisamanngornermi unnukkut akueraat. 13-it akuersipput (Siumut, Nunatta Qitornai Demokraatillu) qulillu akerliullutik (illuatungiliuttut). 

Akitsuutinit nutaanit isertitat aningaasanut inatsimmi amigartooruteqarfiusut matussusernissaannut innuttaasullu peqqinnerulernissaannut pingaaruteqarput. 

Naalakkersuisut akitsuutinik qaffaaneq innuttaasut peqqinnerulernissaannik siunertaqarneragaat 182 millionit koruunit missaannik ukiuni sisamani tulliuttuni pissarsiaqarfiussaaq. Ingerlatseqatigiiffinnulli akileraarut 5 proncentinik appaavigineqarpoq, tamannalu nunatta karsianut ukiuni tulliuttuni sisamani tuttut 162 millionit koruuninik ikinnerulernerannik kinguneqassaaq.

Qanorooq 21.11.2019 Subclip

 

Akerliussutsimilli takutitsisut naapertorlugit akitsuutinik qaffaaneq innuttaasut aningaasaqarniarnermikkut eqqugaassapput. 

- Killilersuerusunngeqigunik sooq pillassavaatigut oqarlutik; peqqinnerulerniassagassi, Pipaluk Lynge-Rasmussen aperivoq.

- Oqarput uagut nammineq akisussaassuseqassasugut – taakku aamma akisussaassuseqartariaqarput, namminneq kaasarfimminiit tunniussillutik, naligaluta.

AAMMA ATUARUK Vittus akitsuutit pillugit: Aap, annernarput pisariaqarpulli

Taamaattumik tassunga uniinnarnianngillat. 

- Akerliussutsimik takutitsinerput iluaqutaanngilaq. Silami nillialluta akerliussutsimik takutitsinerput iluaqutaanngilaq. Allatigut iliortariaqalerpugut: Suliumajunnaarneq atsiortitsinerlu. Naapeqatigiittariaqarput tusarniaaviginiarlugu qanoq iliorsinnaanersugut.

Demokraatit: Inuiaqatigiit pitsaanerusumut alloriartikkusuppavut

Nivi Olsen Demokraatini siulittaasuugallarpoq. Aningaasanut inatsisissaq innuttaasorpassuarnit akerlerineqaraluartoq tassunga akuerseqataavoq. 

- Uummatikkut attorteqqasorujussuuvunga aliasullungalu inuiaqatigiit taamatut qisuariarnerat, Tupigalugu aliasuutigalugulu oqariartorfigaakka. Inuiaqatigiilli pitsaanerusumut alloriartinnialerpagut, Nivi Olsen oqarpoq. 

Naalakkersuisut siulittaasuat isumaqataavoq: 

- Akerliussutsimik takutitsisut pisinnaatitaaffitsik atorlugit maanngarput. Oqariartuuteqarput aamma uagutsinnut, akitsuutinillu qaffaanerit tamatsinnut kalluaapput, Kim Kielsen (S) oqarpoq.

- Akitsuutinilli qaffaanissat aningaasaqarnermut ataatsimiititaliami sammineqareerput, taamaattumik akerliussutsimik takutitsisoqareernerata kingorna allannguisoqassappat aningaasaqarnermut naalakkersuisoq oqaloqatigissavarsi.  

Aningaasaqrnermullu naalakkersuisup – Vittus Qujaukitsup (NQ) – innuttaasut akerliussutsimik takutitsinerat allannguinerannik kinguneqartariaqarsorinngilaa:

AAMMA ATUARUK Demokraatit: Akiligassallit akiliisaraluarunik akitsuutit nutaat pisariaqassanngikkaluarput

- Akitsuutinik qaffaanerit soorunami akueriuminaatsinneqartarput; pisumili matumani akueriuminarluinnarlutik., Vittus Qujaukitsoq taama ilaatigut allappoq.  

Sermitsiaq.ag.-ip allaaserisaani allassimasut naapertorlugit kattuffiit sisamat 3500-t missaannik ilaasortallit akerliussutsimik takutitsisunut tapersiisut ukuupput: Nunatsinni Perorsaasut Kattuffiat (NPK), Ilinniartitsisut Meeqqat Atuarfianneersut Kattuffiat (IMAK), Peqqinnissaq Pilllugu Kattuffiit (PPK) aamma Atorfillit Kattuffiat (AK). Taakku isumaqarput akissarsianik siorna qaffaanerit akitsuutinik qaffaaneq pissutigalugu qatangiinnartut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat