Akerliussutsimik takutitsisut arfineq-marluinnaapput

Akerliussutsimik takutitsinermi akerliuffigineqarpoq aalisarnermut inatsisip allanngortinnissaa, tassani pisassat amerlanerpaaffissat qaffanniarneqarmat aammalu aalisarnerup avataaneersut piginneqataasinnaalernissaat ammaanniarneqarmat. Allanilli aamma aalisartut iluaagisaqarput.

Akissarsiat qaffannissaat, pisassat amerlanerit, licensit atorunnaarnsisaat, puisit amiisa akiisa qaffannissaat aammalu inuuniarnermi atukkat ajorsiartunnginnissaat.

Qaqortumi akerliussutsimik takutitsisut ikittuinnaapput, oqariartuutissaaleqinngillalli.
- Suut tamarmi akitsoriartorput, nerisassat benziinalu akitsorput. Akerlianik pisavut nalikilliartorput. Politikkikkut oqartussanut paaseqquarput napaniassagutta pisavut naleqarnerulertariaqartut, QAPPp siulittaasua Bent Jeremiassen oqarpoq.

- Ataqqivarput pisassiisoqartarnera kisianni pisassat amerlassusaat apeqquserparput. Ilaqutariit napasinnaassappata aningaasat amerlanerusut pisariaqartippagut. Pisassalli taama ikitsigitillugit tamanna aalisartut piniartullu angusinnaanngilaat, Qaqortumi aalisartut piniartullu oqariartuutigaat.

Akerliussutsimik takutitsisut aamma ippinnartippaat bioloogit aalisartunit tusaaniarneqarnerusut misigisimagamikku.

- Bioloogit tusaaniarneqarpallaaqaat. Kisianni uagut tusaaneqanngilagut taamaallaat allaffimmiut, Qaqortormiut siulittaasuat Bent Jeremiassen oqarpoq.

Qaqortumi aalisartut piniartullu 50-it missaanniipput QAPP-milu siulittaasup pakatsissutigaa taakkunannga arfineq-marluinnaat akerliussutsimik takutitseqataammata.