Akerliussutsimik takutitsisorpassuit

februaarip 10-at 2006 16:20

Danmarki Muuamaamillu titartakkat akerliuffiginiarlugit nunani assigiinngitsuni tallimanngornermi qinoqatigiinnerup kingorna akerliussutsimik takutitsisoqaqattaarpoq. Taakku ilimagisamit sakkukinnerupput taamallaat erfalasut ikuallanneqartarput oqaatsillu sakkortuut atorlugit nilliasoqartarluni.

Ingasattajaarlutik muuamaamik upperisarsiortut suleqatigiiffiat Jihad ullumi nalunaarpoq pruffiitimik mitaatiginnittut perloqquneqartariaqartut.

Syriap illoqarfiani Damaskusimi danskit suliffeqarfiutaat Danske Institut titartakkat perulluliuutaavallaaqimmata marsi ilanngullugu matuneqarallarpoq. Tassani sulisut sapaatiummat qimagussorneqarsimapput suliffeqarfiup ungasinngisaani danskit aallartitaqarfiat ikuallanneqarmat.

Dansk Institutimi siulittaasoq, John Madsen ima oqaluttuarpoq:

- Takornariarniartut tamaasa iseqqujunnaarsimavagut, pigaartoqarpugulli. Suliffeqarfitta ammatiinnarnissaa ulorianarpallaaqimmat aalajangersimavugut matugallarniarlugu. Immikkut akuerisaallutik ilinniartut suliffeqarfitsinni sungiusarnissaat qulakkeerluarlugu pilersaarusiorsinnaanngilarput nunanut allanut ministereqarfiup Syrialiarniartut mianersoqqussutinik agguaaffigisarmagit. Taassumalu saniatigut Syriami naalakkersuinermik suliaqartut iliuusissaat maannangaaq ilisimanneqanngimmat aalajangersimavugut marsi ilanngullugu suliffeqarfipput matugallarniarlutigu, John Madsen naggasiivoq.