Akerliussutsimik takutitsisoq:nerisassaativut nikanarsarpaat
Kialluunniit nalugallarpaa nersornaasigaassanersoq, taamaasappalli tamanna akerliunnertalimmik pissaaq.
Sørine Gejl Qassiarsummeersoq nersornaasiinermut atasumik Københavnimi Hotel D’angleterrep saavani akerliussutsimik takutitsinissamut aaqqissuussiniarpoq.
Filmimik tapersersuisut aamma nammineq tapersuinerminnut pissutissaqarput, tassami filmi arlalissuartigut nalilersorneqarsinnaagami ilaatigut misigissutsit aallaavigalugit ilaatigullu sulinermik aallaaveqarluni. Taamaattumik filmip nalilerniarneranut periarfissaqarluarpoq, kisianni uagut piviusulersaarut torrallataasutut isiginngilarput.
Soorunami filmi eqqortorpassuarnik imaqarpoq, soorunami Kalaallit Nunaanni ajornartorsiuterpassuaqarpugut aaqqinniakkatsinnik, soorlulusooq aamma nunani allani Danmarkimilu taamaattoqartoq.
Filmiliortoq uagut nuannarisatsinnik alianaagisatsinnillu assiliisimavoq, soorlu orsoq iginniliassaq seqinertinneqartoq aamma puisip neqaa qassutinut ilineqarsimasoq, taakkulu danskit isaanni illinnarpallaanngillat, tamannalu uanga assut ajuusaarutigaara maanimi illinnartutut nalilertaratsigu.
Sørine Gejl aperineqarami suna neriuutigineraa akivoq:
- Uanga neriuutigaara filmi takutinneqaqqissasoq, taama annertutigisumik isiginiarneqarmat, tassami filmi takutinneqaqqaarmat tusaaniarneqarsimanngilanga, ullumikkulli tusaaniarneqarusullunga misigisimavunga, Sørine Gejl oqarpoq.
