Nuummi akerliussutsimik takutitsineq.Assi: Qanorooq

Akerliussutsimik takutitsisoqareersoq: Politikerit oqalugiaataat neriuuteqartitsipput

Perorsaasorpassuit akissarsiaminnik naammaginninnginnerat pissutigalugu perorsaasorpassuit akerliussutsimik takutitsipput. Isumaqatigiinniarnerit pillugit qanittukkut paasisaqarnerussapput.

- Perorsaasut, perorsaasut, tusarneqarusuppugut!

Perorsaasut Inatsisartunut Nuummi Inatsisartut ataatsimiitarfiata silataani akerliussutsimik tallimanngormat takutitsimmata, inuit 400-nit ikinnerunngitsut taama nilliapput.

Aamma Maniitsumi, Qaqortumi, Ilulissani, Sisimiuni Tasiilamilu akerliussutsimik assingusumik takutitsisoqarpoq.

AAMMA ATUARUK Perorsaasoq akerliussutsimik takutitsereernermi: Suliumajunnaariaannaavugut

Perorsaasut akissarsiatik ikigaat maannalu isumaqatigiinniarnerit malunnaatilimmik akissarsiaqarnerulernermik inerneqassanngippata suliumajunnaarsinnaallutik nalunaarutigereerpaat.

Perorsaasut akissarsiaat ilinniartitsisut isumaginninnermilu siunnersortit akissarsiaannut sanilliullugit 90.000 koruunit missaannik ukiumut appasinnerupput.

Perorsaasorpassuillu politikerinit Inatsisartoqarfiup silataani tikilluaqquneqarput.

Aningaasaqarnermut naalakkersuisup, Vittus Qujaukitsup (NQ), atugaqarluarneruniarlutik akerliussutsimik takutitsisut nersualaarpai. Iluarsiissutissamillu sulissuteqarlutik oqaatigaa:

- Iliuuseqarfigisariaqakkagut Kommuunit peqatigalugit qimerloortariaqarpagut, Vittus Qujaukitsoq oqarpoq.

Qisuariaatit isumallualersitsisut  

Aamma illuatungiliuttut oqalugiarput. Milliardit koruunit arlallit mittarfiliortiternernut atorneqarsinnaappata, aamma isumaginninnermut suliallit aningaasaliiffigineqarsinnaasariaqartut Inuit Ataqatigiit siulittaasuat, Múte Bourup Egede oqarpoq.

- Ukiorparujussuarni atukkasi, aammalu ilungersuutisi qineqqusaarutitut aammalu politikikkut timitalerneqanngitsutut inissisimajuarneri naammalerpoq, Múte Bourup Egede oqarpoq.

Politikerit oqaasii nunatsinni Perorsaaasut Kattuffiata siulittasuanut, Arnaq Brønlundimut isumalluarnerulersitsipput.

- Neriuuteqarpugut oqalugiarfigimmatigut, oqaaserisaminni tamarmik neriorsuuteqarlutik oqariartormata, naak Aningaasaqarnermut Naalakkersuisoq taamatoqqissaaq oqariartuuteqanngikkaluartoq, taanna oqarpoq.

AAMMA ATUARUK Angajoqqaat perorsaasunut suleruluttunut tapersiisut

Arnaq Brønlund kattuffik peqatigalugu Namminersorlutik Oqartussanik ippassaq ataasinngormat isumaqatigiinniaqateqarpoq. Isumaqatigiissuteqarsinnaassanersut ulluni tulliuttuni paasinarsiumaartoq KNR-imut siusinnerusukkut oqaatigereerpaa.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat