Akerliussutsimik takutitsiniat itigartinneqartut
Beijingimili pisortat sumiiffiit akerliussutsimik takutitsiviusinnaasutut aaqqissuussimasaat ullumi atortariaarupput, tassami akerliussutsimik takutitsiniarlutik qinnuteqartut tamarmik ullumi itigartinneqarput.
Akerliussutsimik takutitserusullutik qinnuteqartut akerliussutsimik takutitsinissartik ullunik tallimanik sioqqullugu, kikkut akisussaasuunersut, suna anguniarneqarnersoq, allagartarsuit qanoq angitigisut nassarneqassanersut, megafonillu qassit atorneqassanersut, tamakku tamaasa pisortanut qinnuteqaamminni allassimasussaavaat. Taamaakkaluartoq inuit 124-it akerliussutsimik takutitsinissanut assigiinngitsunut 77-inut qinnuteqarsimapput. Danmarks Radiomiit tusagassiortup, Jan Larsenip narsaamanersuit pingasut akerliussutsimik takutitsivissatut pisortanit piareersarneqarsimasut ullumi takusaramigit politiit ilaannit oqarfigineqarpoq akerliussutsimik takutitsisoqarnavianngitsoq. Pisortanillu ullup ingerlanerani nalunaarutigineqarpoq akerliussutsimik takutitsiniarlutik qinnuteqarsimasut akuerineqarsimanngimmata akerliussutsimik takutitsisoqarnavianngitsoq. Pisortat naatsukullammik nalunaarutigaat qinnuteqarsimasut 77-it ilaat 74-it allaffissornikkut suliarineqarlutik aaqqiivigineqassasut. Jan Larsenilli naapitaata angutip arnaa illuni isaterneqarmat taarsiiffigineqarsimannginnini pillugu akerliussutsimik takutitsiniartoq politiinit nipangeqquneqaannartariarluni naalakkusunngimmat tigusarigamikku suli maanna paarnaarusimavaat. Taamaalilluni inuit kiffaanngissuseqarlutik oqarsinnaatitaanissaannut Kina-p neriorsuigaluarnera arnamut tassunga atuutsinneqanngilaq. Olympiadertut aggustip ulluisa 20-anni naammassissapput.
