Akerliussutimik takutitsilerput

Meeqqat sumiginnagaasartut pissusaat sakkortusigaluttuinnarmata, angajoqqaarsiaasartut atugaasa pitsaanerulernissaat, aammalu meeqqat inuusuttullu innarluutillit sullinneqarnerat naammaginagu, marsip aallaqqaataani angajoqqaarsiaasartut ingerlaaqatigiinnissaat ingerlanneqassaaq.

Angajoqqaarsiaasartut peqatigiiffiata siulittaasuata Ellen Sofie Chemnitz-ip ingerlaaqatigiinnissaq ima tunngavilersorpaa.

- Akerliussutsimik takutitsiniarnerput pissuteqarpoq meeqqat sakkortuumik sumiginnagaasartut angajoqqaarsianut inissitassat amerligaluttuinnarnerat aammalu meeqqat sumiginnangaasartut sammineqarnissaminnik pisariaqartitsinerat pisariuneruleraluttuinnarmat. Naliginnaasumik angajoqqaarsiaanermi meeqqat sakkortusigaluttuinnarnerat angajoqqaarsianut artornarneruleriartorpoq, tamannalu naammagiinnarsinnaajunnaarparput. Ellen Sofie Chemnitz oqarpoq nangillunilu: Meeqqat angajoqqaarsianut inissittariallit amerligaluttuinnarput inersimasunik pisariaqartitsilluinnartut, ilaatigut allaat angajoqqaarsiat angerlarsimaffinniiginnavittussat pisariaqartinneqaleraluttuinnarlutik.

Suliffeqaatigaluta angajoqqaarsiaasarnissarput artornarpallaalersimavoq, meeqqallu sakkortuumik sumiginnagaasimasut ulloq unnuarlu inersimasunik pisariaqartitsisarput. Isumaqarpugut aningaasarsiutigalugu angajoqqaarsianik Nuup kommuneani pilersitsisoqarnissaa pisariaqalersimasoq, aammalu Naalakkersuisunut erseqqissarusupparput, aningaasarsiutigalugu angajoqqaarsiaasartut pisariaqartinneqarnerat annertuneruleraluttuinnartoq.

Ellen Sofie Chemnitz aamma oqarpoq, meeqqat angerlarsimaffiup avataanut inissinneqartussat qassiuneri suli ilisimaneqanngimmat, tamanna naammaginanngilluinnartoq.

- Meeqqat inuusuttullu sumiginnakkat sullinneqarnerini kisitsisit pisariaqarluinnarput, taamaammat kommunit kisitsisaataat utaqqiinnarnagit namminersornerullutik oqartussat, suliassaminik maannakkorluinnaq ingerlatsisariaqarpoq.

Aamma angajoqqaat innarluutilinnik meerallit atugaat naammaginanngitsoq Ellen Sofie Chemnitz oqarpoq, taakkualu aamma atugaasa pitsanngorsaavigineqarnissaat anguniarlugu akerliussutsimik takutitsinissaq ingerlanneqassaaq.

Akerliussutsimik takutitsiniartut neriupput aningaasarsiutigalugu angajoqqaarsiaasartunik peqalernissaa inatsisartunit akuerineqassasoq, aammalu innarluutillit angerlarsimaffiinik naleqquttunik peqartoqalernissaa neriuutigineqarpoq.

Akerliussutsimik takutitsinermi peqataasussat tassaapput PIP, innarluutillit peqatigiiffiat aammalu Nuummi angajoqqaarsiaasartut peqatigiiffiat.