Akerleriik isumaqatigiissaaaniartarfimmiilerput

Isumaqatigiinniarnerit unittooqqammata, Serviceforbundip kissaateqarnera naapertorlugu isumaqatigiinniarnerit Isumaqatigiissaaniartarfimmi Københavnimiittumi ingerlanneqarput.

Danmarkimi kattuffik LO-mut atasoq, Serviceforbundet, Timmisartuni inuttat kattuffiat, Flyvebranchens Personale Union, taassumalu ataani Nunatsinni timmisartuni inuttat peqatigiiffiat, Flyvebesætningsforeningen for Grønland sinnerlugit isumaqatigiinniartuussaaq.

Air Greenlandilu sinnerlugu isumaqatigiinniartut eqqartuussisuserisoqarfimmit Norrbom og Vinding-imit ikorfartorneqarput.

Ataatsimiinneq aallartinngilaartoq illuatungeriit aallartitaat KNR-imiit oqaloqatigaagut. Serviceforbundimi allattaaneq Toni Vagn Rytkønen oqaluttuarpoq, allaat ullumikkut angusaqassallutik neriuutigalugu, kisianni malunnarpoq, soorluuna taamaassangatinngikkaa.

- Air Greenland-imiit piumasaqaatitik maannamut allanngortikkumanngilaat, Toni Vagn Rytkønen oqarpoq.

Air Greenlandip aningaasaqarnini pitsanngorsarniarlugu allanullu unammillersinnaanerujumalluni piumasarisimavaa, timmisartortartumik aningaasarsiatik allanngornagit nalunaaquttap akunnerini amerlanerusuni sulisalernissaat,

Aningaasarsiat ukiumi ataatsimi qaffassannginnerannik, Serviceforbundet akuersaarnikuuvoq, tamannali Air Greenlandip akuersaarumanngilaa, kissaatigigamikku, suliffeqarfiup unammillersinnaassusianut piffissami ungasinnerusumi pitsanngoriaataasumik aaqqiisoqassasoq.

Kisianni Serviceforbundet taama naliliinngilaaq.

- Unammillerneqalernissamit aarlerinerata piviusunngornissaa uppernarsaatissaqanngilaq, Toni Vagn Rytkønen oqarpoq.

Taanna naapertorlugu aningaasarsiat 30 procentimik appartinneqassasoq ilaatigut oqaatigineqarsimavoq. Tamannalu kattuffiup akuerisinnaanngilaa. Soorlumi oqartoq:

- Aamma uagut upperisinnaasariaqarparput, angusavut ilaasortatta taasissutigilerunikkit akuersissutigisinnaagaat.

Kisianni Michael Binzer naapertorlugu, kisitsisit taaneqartoq piviusorsiunngilluinnarput toqqaannartumillu salluullutik. Taassuma erseqqissarpaa, Air Greenlandip timmisartortartuisa qanoq sulitiginissaannut tunngasunik suli kisitsisaateqannginnamik, aammalu aningaasarsiat apparnissaannik piumasaqanngilluinnarsimallutik.

- Aamma kikkut pineqarnersut eqqaamasariaqarparput. Air Greenlandip timmisartortartui Kalaallit Nunaanni aningaasarsiaqarnerpaanut ilaapput. Uagut piumasaraarput, aningaasarsiarissaarnertik pillugu nalunaaquttap akunnerini amerlanerusuni timmisartortassasut, Michael Binzer oqarpoq.

Taassumali aamma erseqqissarpaa, ullumi isumaqatigiinniariartoramik qilersorsimanatik tusarnaarnissamullu piareersimallutik. Aammali illua tungitik isornartorsiorpai, sumik kissaateqarnerminnik erseqqilluinnartumik nalunaaruteqarsimannginnerarlugit. Neriuutigaalu, qanoq isumaqatigittoqarsinnaaneranik isumaqatigissaaniartartoq tikkuussiumaartoq.

Tassalu qanoq ingerlariaqqittoqassanersoq Isumaqatigiissaaniartarfiup aalajangissavaa. Eqqartuussiviit qullersaanni, Højesteretsimi eqqartuussisoq, Asbjørn Jensen, isumaqatigiissaaniartuuvoq.

Air Greenlands suliartoqqusiunnaarnera sapaatiuppamiit atuutilissaaq. Timmisartortartut ilaasunullu sullissisunut eqqugaapput kattuffeqatigiikkamik. Isumaqatigiissaaniartartoq aalajangersinnaavoq, illua tungeriik unnuaq qupillugu isumaqatigiinniassasut allaallu sapaatit akunerata naanera ilanngullugu ataatsimeeqqusinnaallugit. Aammali suliartoqqusiunnaarnissaq siullermik ullunik 14-inik kinguartissinnaavaa, illua tungeriillu isumaqatigiissinnaanngippata kinguartitsineq sapaatit akunnerinik marlunnik ilaqqissinnaalugu.

Tamatuma kingorna isumaqatigiissuteqanngippata, taava sulinerup unitsinnissaa avaqqunneqarsinnaassanngilaq.

Isumaqatigiiniarnerit qaqugu inerneqarumaarnersut illua tungeriit arlaannaataluunniit suli eqqoriarsinnaanngilaa.