Akeqanngitsumik tuluttut ilinniarsinnaavutit

Oktoberip aallartinneraniit periarfissaqalissaaq tuluit oqaasiisa paasisaqarfinerulernissaat. Aallarterlaanut tuluttut oqaatsit ulluinnarni atorneqarnerusut pikkorissaatigineqassapput sungiussisimanerillu sapernarnerumaanik unammilligassaqarput. Taakku saniatigut niuernermi tuluit oqaasii pikkorisaatigineqassapput.

- Akeqanngitsumik tuluttut pikkorissaanissamut aallarniutaasumik isumaqatigiissusiortuupput Danmark, USA aamma Kalaallit Nunaat. Ataatsimiititaliaq Joint Commitee ilinniartitaanermut tunngasunik sammisaqarfiuvoq. Tassungalu tunngatillugu amerikamiut peqataaffigerusuppaat kalaallit tuluttut piginnaasaasa qaffassarnissaat. Pikkorissaanerit ingerlanissaat uagut isumagaarput amerikamiullu aallartitaqarfiata aningaasartuutit akilerpai. Pikkorissaanerit naammassippata nalunaarusiorfigiumaarpagut, Per Thomsen Niuernermik Ilinniarfimmiit nalunaarpoq.

Nuummi inuussutissarsiortut ujartuisimapput niuernerup iluani tuluttut oqaatsit pikkorissaatigineqalersaarnersut paasiniarlugu, tamannalu malinniarlugu Nuummi Niuernermik Ilinniarfik aalajangersimavoq. Pingasunngornermi ullaap tungaa niuernerup iluani tuluttut pikkorissartut 15-it aallartissapput.

- Siunissaq Kalaallit Nunaata ornitaa eqqarsaatigalugu suliffeqarfinni sulisut tuluttut pikkorinnerulernissaat avaqqunneqarsinnaanngilaq. Tamanna sulisut suliffeqarfiillu kisaaatigaat. Pikkorissartullumi niuernermi oqaatsinik pikkorinnerulernissaat anguniarparput, Niuernermik Ilinniarfimmi ukiap ingerlanerani pingasoriarluni amerikamiut Københavnimi aallartitaqarfiat suleqatigalugu tuluttut ilinniartitsisussaq Lise Lotte Laursen oqarpoq.

2013-mi upernaakkut tuluttut pikkorissaanerit arfineq marluk ingerlanneqassapput. Pikkorissaatigineqartussat ilagaat internet atorlugu pikkorissartitsineq. Taanna aqqutigalugu sineriammi najugallit peqataasinnaapput.

- Suli ilisimaqqissaanngilarput pikkorissaanerit imarisassaat. Kisianni ukiaanerani pikkorissaanerit arlaat ulikkaassappat ilimagineqarsinnaavoq juulli sioqqullugu pikkorissaasoqaqqinnissaa. Massakkorpiaq takusinnaasakka malillugit akeqanngitsumik pikkorissaanissani inissat affaat inuttalerneqareerput nalunaarnissamullu killigitinneqartoq tassaavoq septemberip 26-at. Aamma qularutiginngilara pikkorissaanissani inissat tamarmik atorneqarumaartut Per Thomsen KNR.gl-mut nassuiaavoq.

Qaqortumi Niunermik Ilinniarfik aamma amerikamiut aallartitaqarfiannit aningaasaliiffigineqarpoq tuluttut pikkorissaanerit taqqavani ingerlanneqarnissaannut.

Ugguuna nalunaartoqarsinnaavoq: http://ninuuk.gl/efteruddannelser/usembassy/customerserviceenglish/#.UFdW_ZGIrfE