Akeqanngitsumik timigissarusunngillat

Periarfissatsialassuaq akeqanngitsumik ingerlanneqartussaq inooriaatsimut peqqinnerulernissamik pilersitsisinnaasoq iluliarmiut soqutiginngilaat. Neqeroorutaagaluarpoq pingasoriarluni inooriaaseq pillugu oqalliseqataanissaq ataasiarlunilu ilitsersuisoqarluni timigissarneq. Peqataaniarlunili nalunaartoqannginnera pissutigalugu pisussaq taamaatinnartariaqarsimavoq.

Tusaannarlugu neqeroorutitsialassuugaluartoq Ilulissani innuttaasunit soqutigineqanngilaq.

- Neriuutigisimagaluarparput innuttaasut soqutigalugu neqerooruterput tigulluassagaat. Illoqarfiup qeqqani utoqqaallu peqatigiiffiinut allagarsiigaluarpugut kinguneqanngitsumik, Katrina Mathiesen Qaasuitsup Kommuniani pitsaaliuinermut siunnersorti KNR.gl-mut oqarpoq.

Aaqqissuussaq qaammatip aappaa avillugu ingerlanneqartussaagaluarpoq, kulturip illorsuani Sermermiut initaanni, Ilulissallu timersortarfiata timigissartarfiani ingerlanneqartussaagaluarluni.

Aaqqissuussinermi sammisassat ilaatigut makkua sammitinneqartussaagalugarput: Utoqqarnut nerisaqartitsineq, nerisaqartitsinermut siunnersortimit nutserisulerluni ingerlanneqartussaq. Pujortarneq pujortarunnaarnerlu, pitsaaliuinermut immikkoortortaqarfimmi pisortaq pujortarunnaarnissamut ilitsersuisoq suleqatigalugit, kiisalu kappoqqusersuilluni pujortarunnaartitsiniarneq Kalaallit Rødekorsiat suleqatigalugu. Imigassaq pillugu, Qaqiffimmit, timersornerlu timigissarnermit ilitsersuisumit ingerlanneqartoq.

Takkussinnaannginnermullu pitsorluttuuneq utoqqatsissutaasinnaanngilaq tassami Qaasuitsup Kommuniata innarluutilinnut bussit atorlugit aallernissaq aamma neqeroorutigisimagaluarpaa.

Qaasuitsup Kommunia ukioq una naatinnagu assinganik neqeroorusioqqinniarluni neriorsuivoq.