Aka Jensen Kinami illoqarfissuarmi Guangzhouimi millionilikkaanik inulimmi atuaraluarpoq. Junimi aatsaat angerlartussaagaluarluni coronavirus peqqutaalluni maanna nunatsinniippoq.Assi: Privat

Aka Kinamit angerlaqqamersoq: Kissarnersiorpaannga kikkullu tamarmik kiinnamikkut assiaquteqarput

Aka Guangzhoumi atuaraluarpoq - nualluulli coronavirus peqqutaalluni Nuummut angerlaannartariaqarpoq.

Mittarfimmi kissarnersiorneqarneq. Kikkut tamarmik kiinnamikkut assiaqutillit. Meeraq sumi tamaani meriartoq. Tamakkuupput Aka Jensenip Kinamit nunatsinnut angalanermini misigisaasa ilaat.

- Kinameeqqammerpunga coronavirusilu peqqutaalluni angerlaannarnikuullunga, 17-inik ukiulik Nuummeersoq Aka Jensen oqarpoq. Taanna massakkut Nuummiippoq.

Tunillaassortunik nappaalasoqarneranut ataatsimiititaliarsuup innersuussutai:

- innuttaasut nunami aarlerinaatilimmeereerlutik nunatsinnut uternerminniit ulluni 14-ini tulliuttuni angerlarsimaannaqqusaapput.

- innuttaasut nunami aarlerinaatilimmeereerlutik nunatsinnut utersimasut napparsimmavinnut, utoqqaat illuinut illuutinullu allanut aarlerinaateqarfiulersinnaasunut ornigutinnginnissaat innersuussutaavoq.

Nunat aarlerinaatilittut pineqartut makkuupput:

- Italiami nunap ilai Emilia-Romagna, Lombardiet, Piemonte Venetolu
- Irani tamarmi
- Kina (Hong Kong, Macau Taiwanilu minillugit)
- Korea Kujallermi nunap immikkoortua Gyeongbuk tassanilu illoqarfissuaq Daegu 

Tusarfik: Nunatta tunillaassortunik nappaalasoqarneranut ataatsimiititaliarsua, Danmarkimi peqqissutsimut aqutsisoqarfik

Aka Kinami illoqarfissuarmi Guangzhouimi millionilikkaanik inulimmi atuaraluarpoq. Junimi aatsaat angerlartussaagaluarluni coronavirus peqqutaalluni maanna nunatsinniippoq.

Angalaneq immikkut ittoq

Februaarip arfernani Kinamit Tyrkiamukarpoq. Angalaneralu misigisaavoq immikkut ittoq.

- Kikkut tamaavimmik kiinnamikkut assiaquteqarput. Assiaquteqanngitsut tunineqartarlutik. Tassami mittarfimmiinneq ulorianartorujussuuvoq, Aka Jensen oqarpoq.

- Meeraq aamma sumi tamaani meriartoq takuara. Eqqumiik. Meriaa qanillinaveersaaginnarpara.

Inuit coronavirusimik tunillatsissimasut nunarsuaq tamakkerlugu 100.000-init amerlanerulerusut uppernarsarneqarpoq. Inuillu 3404-t nappaat toqqutigaat.

Misissorneqaqattaarpoq

Tunillatsissimasut amerlanerpaartaat Kinamiipput. Tunillatsissimasunit 80.000-it sinneqarmata, tassanilu toqquteqartut 3000-it missaanniillutik.

Aka Jensen Kinamit aallalerami kissarneqarnersoq misissorneqarpoq:

- Sukkasoorujussuarmik kissarnersiorpaannga. Qujanaqaaq kiaqarnersunga misissoraminnga, tassami kissarneqaraluaruma aallaqqusaanavianngilanga.

AAMMA ATUARUK Kangerlussuarmi Nuummilu ineeqqanik piareersimatitaqarput

Tyrkiep mittarfiani inuit akornanneeqqusaasimanngilaq:

- Inunnit allanit ningortinneqarpugut. Misissorneqaqattaarlutalu. Taavalu imertukkagut igeqquneqarlutik.

Aka Jensen angerlarsimaffimminiittoq.

 

Aka sivisuumik angalereerluni kiisami Københavnip mittarfissuanut tikippoq.

Innuttaasut nunami aarlerinaatilimmeereerlutik uternerminniit ulluni 14-ini angerlarsimaannaqqusaasut, tunillaassortunik nappaalasoqarneranut ataatsimiititaliarsuup innersuussutigaa.

Tunillaassuineq imatut pinaveersaartissinnaavat:
- Assaat qaqorsaaserluarlugit asalluartarlugit
- Assaat tunillannartuiaammik tanittarlugit
- Quersornermi kakkissarfiit ataasiartakkat quersorfigeriarlugit igittarlugit
- Quersornermi qaneq talimik asserlugu
- Tangajornermi qaneq talimik asserlugu
- Qinngat isillu passunnaveersaarlugit

Tamannalu Akap malippaa. Københavnimi sapaatit akunneri marluk ataataminiippoq.

- Ataatagalu susassaaleqeqaagut. Youtuberujoortarpunga filmerusaarlungalu.

Inuit qanorinnersunga apersorput

Aka ullumikkut Nuummiippoq. Naak nunatta issinneranut tupaallakkaluarluni peqqippoq.

- Aamma suliffittaarnikuuvunga. Sulinngikkaangama ikinngutikka ilagerujoortarpakka.

Nunatsinnullu uterami inuit tikilluaqqulluarsimagaat ilanngullugu oqaatigaa.

- Qujanartumik nuanniitsumik nalaataqanngilanga. Inuit amerlanertigut qanorinnersunga aperisarput.

Aka Jensen aasamut GUX-imi atualissaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat