Aka Høegh-p saqqummersitsinera Prins Henriup takusarpaa

Nunatsinni eqqumiitsulianik nuannarinninneq ersersinneqarpoq kunngikkormiusut ataqqinassusilik Prins Henrik ippassaq Aka Høeghip Nordatlantens Bryggemi saqqummersitsineranut takusaammat. Inuttaa taama oqarpoq saqqummersitsinerup ammarnerani KNRip malinnaatitaanut.
Aka Høegh
januaarip 10-at 2013 06:46

- Ullumikkut maaniippunga takutikkusullugu Aka Høeghimik eqqumiitsuliortarneranillu  nuannarinninnera, Prins Henrik KNRimut oqarpoq.

Taassuma Aka Høegh ukiorpassuarni ilisarisimavaa kalaallillu eqqumiitsuliaanik katersarpassuaqarpoq maanna Gentoftemi Schæffergårdenimi takuniarneqarsinnaasunik.

- Kalaallit eqqumiitsuliaat nuannariuaannarsimavakka. Isumaqarpunga assigiinngitsorpassuusut taakkulu ilaat katersorsimavakka, Dronningip uia oqarpoq.

Mannalu saqqummersitsineq taassuma nuannarilluinnarpaa.

- Soqutiginartorujussuuvoq sorpassuarnik imaqarami, tassaasinnaappummi uulialertakkanik qalipakkat, titartakat, qarsungasumik suliat qiperukkallu, oqarpoq.

Saqqummersitsinermi ippassaq ammarneqartumi imaq aallaaviuvoq. Eqqumiitsuliat nutaanerit arlalissuit taassaapput qissianit qiperukkat.

- Imaq uannut pingaarutilerujussuuvoq. Danmarkimi imaq takusinnaajunnaaraangakku ipianngulersarpunga. Immamut qanittuni illoqarpugut tassanngaanniillu takusinnaajuaannarparput qatsunganersoq anorersuassamaalernersorluunniit, Aka Høegh nassuiaavoq.

Saqqummersitsinermi suliani pingaartinneqarnerpaaq tassaavoq paarnaqulluup avalequtaanit suliaq eqqumiitsuliortoq Anne-Birthe Hove aasaq toqukkut qimaguttoq eqqaaniarlugu suliaasoq.

- Tamanna eqqarsaatigileraangakku qullilisarpunga tassami ikinngutiga asasara aasaq annaavara. Sissami paarnaqulluit avalequtaannik katersivunga taakkulu atorlugit ikinngutiga eqqaaniarlugu 'qilaliarneq' suliaraara, Aka Høegh nassuiaavoq.

Saqqummersitsinerup ippassaq ammarneqarnera nunatta aallartitaqarfiani Naalakkersuisut siulittaasuata ukiortaami ilassinninnerata nalaani pivoq. Tamannalu sunniuteqarluarpoq aaqqissuussinerit tamarmik takuniaasunik inuppassuaqarmata.