AK: Akissarsiassaqanngippat qinigassanngortittartut ikilissapput
Namminersornerullutik Oqartussat suliffeqarfiutaanni atorfillit akissarsiatik pigiinnarlugit qinigassanngortittarnerat ukioq ataaseq qaangiuppat atorunnaartussaq, Atorfillit Kattuffiata uggoraa, allaallu siunissami qinigassanngortittartut ikilinissaannik kinguneqassangatillugu.
Atorfillit Kattuffianni siulittaasoq Erik Hammeken ima oqarpoq:
- Qineqqusaarsimaneq pissutigalugu akissarsianik ilanngaatsittoqartassappat naatsorsuutigisariaqassaaq, piukkunnartorpassuit qineqqusaarnissaraluaminnit tunuarsinnaanerat. Aamma taamaalilluni inuit tamarmik oqartussaaqataanerat ajortumik sunnerneqassaaq. Erik Hammeken taama oqarpoq.
Demokraatit Inatsisartuni ilaasortaatitaata Per Skaaningip Folketingimut qinigassanngortittut ilaasa akissarsiatik pigiinnarlugit qinigassanngortissimanerat allakkatigut uparuarsimavaa, naak Inatsisartut 2003-mi ukiakkut ataatsimiimmata naalakkersuisut akuerseqataasimagaluartut, pisortat suliffeqarfiutaanni atorfillit siunissami qinigassanngortinniartut akissarsiaqarnatik qinigassanngortittalissasut.
Naalakkersuisut siulittaasuat Hans Enoksen Per Skaaningimut allappoq, ajuusaarluni, taamanili iluarsiisoqarsimanngimmat. Erseqqissaatigaali pisortaqarfiit maanna allaffigineqartut, ukioq ataaseq qaangiuppat pisortani atorfillit akissarsiaqaatigalutik qinigassanngortissinnaajunnaassasut.
Aqutsinermut Pisortaqarfimmi pisortaq Peter Schulz oqarpoq, suliat suliarineqartarnerat eqqarsaatigalugu aappaatigut taamanili ingerlaannartumik allannguiniartoqarsimagaluarpat Folketingimut allanullu qinersinerit sioqqullugit maleruagassat allanngortinnissaat angumerineqarnavianngikkaluartoq.
Maleruagassat nutaat kommunit suliffeqarfiutaanni atorfilinnut namminersortunullu atuutinngillat, taakkunani atorfillit akissarsiassaat aningaasanut inatsimmi allassimanngimmata.
Taamaattorli maleruagassat nutaat Atorfillit Kattuffiannit akueriuminaatsinneqarput.
- Isumaqarpunga Hans Enoksenip piviusunngortitsisoqartinnagu atorfillit kattuffiit assigiinngitsut oqaloqatigeqqaarsimasariaqaraluarai. Erik Hammeken erseqqissaavoq.
